13 anyos namatay sa ‘pinusilay’

Usa ka 13-anyos nga batang lalake ang gipusil sa wa mailhing lalake samtang nakig-uban sa iyang mga higala sa Barangay Paknaan, siyudad sa Mandaue niadtong Huwebes sa gabii.

Si Kenneth Tampus, taga Zone Tamatis sa Paknaan, namatay sa Vicente Sotto Memorial Medical Center ( VSMMC) sa siyudad sa Sugbo paglabay sa pipila ka mga oras.

Si Senior Insp. Mercy Villaro, tigpamaba sa Mandaue City Police Office (MCPO), niingon nga ang biktima uban sa lain pang mga menor nanagtapok sa hilit nga lugar, duol sa 6.5 hektaryang luna sa relocation site nga nagsaulog sa monthsary sa ilang gang. “Monthsary man kuno sa

gang nila sa Paknaan. Kaning bataa apil ni sa gang group nga Bradada,” said Villaro.

Mga menor nakadungog og buto sa armas mga alas 8:55 sa gabii ug nakakita kang Tampus nga samdan.

Gidala si Tampus sa Eversley Child Sanitarium tungod sa samad pinusilan sa ubos sa iyang tiyan, matod ni Villaro.

Siya niingon nga usa ka staff sa Eversley ang nanawag sa Mandaue Police Station (MPS) 3 nga nagpahibawo nga samdan ang usa ka menor nga gidala sa tambalanan.

Matod sa inahan ni Tampus nga niduaw sa police station, ang iyang anak namatay sa VSMMC.

Dihang ang mga imbestigador nangutana sa mga menor kon kinsa ang kauban ni Tampus dihang nahitabo ang pagpamusil, si Villaro niingon nga nisulti ang mga kauban nga dunay “nagpinusilay.”

Apan gibakwi na usab kini sa mga batan-on.

“Ang mga bata sa area silent sila. Di manulti kinsa,” dugang ni Villaro. Susihon sa MCPO ang background sa biktima. Wa pa mailhi ang gunman sa pagsuwat ning taho.