Merkado sa Tabunok di mahuman ning buwana

Gitukod nga modernong mer kado sa Tabunok, dakbayan sa Talisay dili mahuman ning Nobiyembre 2017 subay sa gisaad sa kontraktor.

Kini maoy gibutyag ni Talisay City Engineer Gamaliel Vicente, Jr.

Nasukwahi kini sa kagustohan ni Mayor Eduardo Gullas nga mapadali ang paghuman sa merkado.

Matod ni Vicente, posibling mahuman kini karon pang buwan sa Disyembre.

Una niini si Gullas niingon nga mas maayong mahuman kini duha ka buwan sa dili pa ilang

target nga pagtapos sa proyekto. Apan gibutyag ni Vicente nga ang kontraktor, Tuanson Construction, mipahibawo nga dili madala karong buwana.

Nadugay sila sa pagsugod og trabaho sanglit nalangan ang pagbalhin sa mga manindahay nga maigo sa construction. Dugang pa, adunay mga poste sa kuryente nga dugay usab nga nabalhin hinungdan nga dili sila makalihok.

Hinuon, giklaro ni Vicente nga bisan og dili mahuman karong buwana, nasulod pa gihapon kini sa ilang plano tungod kay Disyembre ang target nga mahuman ang proyekto.

Sa pagkakaron, ang phase- 1 nahuman na ug nabalhinan na gani og balik sa mga manindahay.

Samtang, ang padayon karong gitukod nga phase- 2 anaa na sa 60 porsiyento nga pagtrabaho ingon man ang Water Treatment Facility nga anaa na usab sa 60 porsiyento.

Si Gullas, sa iyang bahin, niingon nga wala siyay nakitang suliran kon dili mahuman karong buwana.

Matod niya ang mahinungdanon nga maayo ug lig-on ang pagtrabaho sa ilang merkado sanglit migasto og dako ang siyudad alang niini.

Nasayran nga ang bag-ong merkado sa Tabunok mogasto og P165 milyones.