Hiyas ni Vidal

Maisip nga usa sa mga dakong funeral procession ang kang anhing Archbishop Emeritus Ricardo Cardinal Vidal dinhi sa nasod. Ang labing dako mao ang kang anhing Senador Benigno “Ninoy” Aquino Jr. niadtong 1983 nga maoy nakalumpag sa diktaduriyang Marcos. Bisan ang kadagkuan sa simbahan ug mga opisyal nakugang sa kadaghan sa mga tawo nga nanambong sa lubong kay nagpaabot lang unta sila og mga 20,000 apan niabot na hinuon kini og 55,000.

Daghang mga tawo ang nanaglinya sa kadalanan nga giagian sa prosesyon.

Bisan lang gani sa iyang haya, liboan ka mga tawo ang manglinya kada adlaw aron lang makasud-ong sa iyang haya.

Wa kini mahitabo sa uban pang kadagkuan sa simbahan nga unang ningtaliwan. Diha ra kini kang Cardinal Vidal gihimo sa bagang duot sa mga Katoliko.

Di tingali tungod kay lider siya sa simbahang Katoliko mao nga daghan ang gustong motan-aw ug makahalad og pag-ampo alang kaniya.

Tingali, tungod kay bisan sa iyang pagkahalangdon isip prinsipe sa simbahan dinhi sa Sugbo, pabilin siyang ligdong ug mapaubsanon. Mga hiyas ug taras nga angay sa usa ka lider, sa simbahan man o kagamhanan.

Si bisan kinsa nga yanong tawo nga gustong moduol kaniya kon dunay kahigayunan, di niya hikawan.

Sa iyang ka yano ug kaligdong, nahimo siyang popular hinungdan nga bisan ang labing gamhanang mga pulitiko sa nasod, nagtahod kaniya. Maminaw sa iyang tambag, sama kang kanhi presidente Gloria Macapagal Arroyo nga mipalingkawas kang kanhi presidente Joseph Estrada sa bilanggoan.

Unta ang mga hiyas ni Vidal panaminan sa pipila ka mga opisyal sa kagamhanan sa dakbayan sa Sugbo nga inay moserbisyo sa katawhan, mao nay nagpaserbisyo ug nagpatahod.