Dili mangaway

Atol sa iyang homily sa requiem mass alang ni anhing Cebu Archbishop Emeritus Ricardo Cardinal Vidal, gibutyag ni Cebu Auxilliary Bishop Dennis Villarojo nga kanunay siyang pahimangnuan ni Cardinal Vidal nga dili mangaway. ‘Ayaw pangaway ni bisan kinsa. Pagkat-on ug pugong sa imong emosyon kay basin ang tawo nga imong awayon maoy makatabang nimo sa umaabot nga mga adlaw ug atimana ang kaigsu-unan nga mga pari', matod pa ni Msgr. Villarojo, kinsa nahimong personal secretary ug speech writer ni Cardinal Vidal.

Gi-anggaan si Vidal sa iyang mga suod nga higala ug sa mga tawo nga personal nga naka-ila kaniya nga ‘man of peace'. Kini gumikan kay nahimo siyang taytayan sa mga tawo nga nagkasungi ug nagka-uliay sa ilang maayong kabubut-on. Ang mga mithi ug prinsipyo ni Cardinal Vidal angay sundon sa katawhan ug public servants.

Akong pik-apon ang pulong ‘ayaw pangaway'. Sa dihang buhi pa si Cardinal Vidal naminaw ba kaha sa iyang mga tambag kining maong mga tawo nga midayig kaniya? Atong i-sentro sa duha ka mga pulitiko dinhi sa dakbayan ang atong komentaryo.

Kining duha ka mga pukitiko ang ‘ kanhi laos' ug ang pilderong pulitiko nga morag iro ug iring nagpatuo-tuo ng mga rehilyoso, naminaw ba kaha sa Halandong Cardinal? Sila kusog mangaway.

Karon maayo lang sila manulti nga atong sundon ang mga maayong binuhatan ni Cardinal Vidal apan ila ba usab kaha kining gisagop sa dihang diha pa sila sa gahum? Wala ba kahay mga tawo nga ilang natapakan o napasakitan? Mao ni klaseng mga tawo nga mga hipokrito.

Siguro mangutana mo nganong ang title nga Cardinal naa man ibutang sa tunga sa first name ug family name sa usa ka Cardinal? Nganong Ricardo Cardinal Vidal man? Nganong dili man Cardinal Ricardo Vidal? Ang ubang title bisan sa mga opisyal sa simbahan anaa man sa unahan. Sama sa Father, Monsignor, Bishop ug Pope. Ang uban sama sa attorney, engineer, doctor ug professor naa man gihapon sa unahan. Ang tubag nganong ang title nga Cardinal naa man sa tunga gumikan kay kini gitawag nga ‘sign of humility’ o pagkamahi-ubsanon.

(bobbygnalzaro@gmail.com)