Usa ka duha ka gugma
Talagsaon gyod kaayo ang lubong ni anhing Cardinal Ricardo Vidal. Kapin kon kulang sa 50 ka libo ka mga tawo ang mitambong niini. Tulo ka cardinal ang didto kuyog sa 30 ka mga Obispo ug mga 400 ka mga pari. Usa kini ka pangilin. Ug angay lamang.
Daghan na ang nasulti ug nahisulat mahitungod sa atong pinalanggang Cardinal. Sa akong bahin, wala akoy pagduhaduha nga siya ang amahan sa San Pedro Calungsod Bible Translation Commission nga naghubad sa upat nga ebanghelyo ug, puhon, sa tibuok bibliya. Siya pod ang amahan sa daghang adbokasiya sa Dilaab.
Ang una niini mao ang pagpakigbisog batok sa ginadiling droga nga gibindisyonan ug gi-amomahan niya niadtong 2002. Kini ang liso nga miturok na sa Labang, ang atong “community-based recovery program.” Sa 2003 gipalutaw niya ang tingog sa Sugbo mahitungod sa pag-impeach ni Chief Justic Davide. Dili kini makatarunganon.
Sa 2005 gitugotan niya ang pagsugod sa VLS kun Values and Leadership School alang sa PNP. Lisod pod kini sa “Kaunting Pahinga” nga gipahigayon sa duha ka mga diyosesis sa Metro Manila. Sa 2008 gihugpong niya ang mga obispo sa Visayas aron paganinaw sa papel sa Simbahan panahon sa piniliay. Sa 2010 gilusad niya ang “I Vote God” panahon sa piniliay sa 2010. Haom kini sa wali nga gihatag ni Bishop Dennis Villarojo sa Sugbo niadtong milabay nga Huwebes sa dihang miingon siya nga dili gyod mangaway si Cardinal, sa ato pa, tulay Binasi sa Esodo 22:20-26; Salmo 18; 1 Tesalonica 1:5-10; ug Mateo 22:34-40 siya sa Simbahan ug Estado ug uban pang mga sektor.
Sa dihang gipangutana si Jesus mahitungod sa balaod nga labing labaw sa tanan, gidugtong niya ang gugma sa Dios ug gugma sa silingan. Dili kini mahimong bugtuon; ang timail-han sa tiunay nga gugma sa Dios mao ang gugma sa tawo ug ang sukaranan ug gamot sa tinuoray nga gugma sa tawo mao ang gugma sa Dios.
Nagbarog, kon akoy pasultion, si Cardinal, taliwala sa Simbahan ug Estado – bisan pag sa Simbahan gyod siya nanukad – sa iyang pagka-obispo. Mao kini iyang taras. Tawo siya alang sa kalinaw.
Sa libro sa Esodo nagpahimangno ang Ginoo sa mga Israelitas sa pag-ayo og tratar sa mga langyaw nga nagpuyo taliwala nila kay, sa pulong pa sa Dios, “kaniadto mga langyaw usab kamo sa yuta sa Ehipto.” Ang tawo nga nahigugma sa silingan magsugod usa diha sa gitawag nga empatiya – ang pag-ila nga ang kahimtang sa uban ato sab nga kahimtang, bisan sa laing paagi. Taas kaayo tog empatiya si Cardinal. Mao nga maantigo siyang maminaw.
Ang makapalutaw sa mga maayong hiyas sa tawo mao ang Kristohanong pagtuo, paglaom, ug paghigugma. Mao kini ang punto sa unang sulat ngadto sa mga taga Tesalonia. Si Jesus maoy modelo niining mga hiyas. Ang mosunod ug mosangyaw kaniya maliwat pod kaniya. Si Cardinal midawat kang Jesus.
Duha ka gugma. Gidugtong diha kang Jesus. Ang midawat kang Jesus midugtong usab niini.
Midawat sa gugma ni Jesus si Tatay Carding. Salamat Cardinal.