Deposito sa ospital

Kay naglisod kog ginhawa sayo sa gabii duha ka Dominggo nga miagi busa nideretso kog adto sa St. Vincent General Hospital diha tupad sa Abellana national high school.

Giateman man tuod ko nga walay kyaw-kyaw para deposit diha sa Emergency Room di sama adtong pulis nga napusilan apan gibalibaran sa Chong Hua hospital.

Apan diha na ko nadismaya dihang giingnan ko nga mahimo nang balhinon ko sa ICU. Giingnan akong anak nga mag-deposit una mi og P40 mil.

Unya, kay kinahanglan man mi mangitag kwarta gabii sa Dominggo (di sila mosugot nga buntag na motunol sa deposit), malangay gyud ko sa ER. Unsa bang pagka unsaa nga duna man say penalty kon mahuman na daw ang serbisyo sa ER unya di ko mobalhin dayon og ICU o bisan pribadong kwarto.

Mao to nga amo na lang gibayran ang ER service nila ug nibalhin mi sa Vicente Sotto Memorial Medical Center (VSMMC).

Magpasalamat ko sa VSMMC kay moderno man ang ilang mga kahimanan labi na sa ICU ug lahi na gyud sa akong ma-imagine sa una sa usa ka pangpublikong hospital.

Balaod

Kining maong kasinati-an, uban sa akong nabasahan adtong pulis nga napusilan, nakakumbinser kanako nga kulang kaayo ang balaod nga nagdili sa mga hospital nga mangayog deposit kon emergency cases.

Dawaton man tuod ka, apan di sila mosugot nga ma-admit ka kon walay deposit. Ug diha ko nagpa-alim sa usa ka hospital nga kintahay alang sa mga kabus. Unsa na kaha kon napadpad ko sa mga mahalong pribadong hospital?

Manghinaot ko nga maabot kining maong lindog kang Kong. Raul del Mar nga nagpakabana sa mga pasyente.

Tuburan

Daw way suliran sa larangan sa politika kining si Mayor Aljun Diamante dihang gikasal ang iyang anak kagahapon sa hapon diha sa Capitol Parish.

Hinuon, sa akong pag-aninaw sa kahimtang karon diha sa lungsod sa Tuburan, dako ang posibilidad nga madugay-dugay pa gyud nga makalingkod kining iyang kaatbang nga si Daphe Lagon isip mayor. Tungod kini sa daghan pang madangpan ni Diamante nga remedyo nga legal.

Ang makapahimuot sa iyang posisyon karon kay kon pananglit mapildi, kapin sa usa ka tuig na lang nga makalingkod si Lagon.

Dayon, kon moguwa nga napildi si Diamante karong terminoha, mahimo na sab diay siyang makalansar og laing tulo ka termino sugod karong 2018.

Sa akong tan-aw, kahigayonan na unta ni Lagon ang 2018 kay dili na makadagan si Aljun. Kon tibuok termino siyang makalingkod, mas dako ang posibilidad nga makagamot na siya ug maglisod na pagbalik si Diamante.