Kuyaw ang atoang karsada

Sayo ning tuiga, dunay bisita nga foreigner ang Sunstar Media Group. Usa kini ka Amerikano nga nagbase sa Florida. Pipila ka adlaw ang iyang pagpuyo dinhi alang sa usa ka business presentation. Usa sa among mga meeting, iyang gipakita ang usa ka video footage sa iyang nasaksihan nga dagan sa trapiko nga nakapa shock kaniya. Nagabot sa usa ka crossing ang mga sakyanan nga iyang gituohan nga magbangga, apan na shock siya kay wa mahitabo ang iyang gipaabot.

Pwerte niyang katawa samtang siya nagpakita sa footage nga iyang nakuha gikan sa taas sa hotel nga iyang gipuyan. Maorag di siya makatuo sa iyang nakita kay gubot pa sa lukot ang dagan sa mga sakyanan.

Amo siyang giingnan nga ingon na niana ang kahimtang sa atoang trapiko. Nagpanglingolingo siya dala ang pahiyom ug katawa.

Bitaw, daghan sa mga karsada nato dinhi nga lisod sabton ug kuyaw ang kahimtang alang sa mga pedestrian. Pipila niini kanang mga eskina sa dan Pelaez ug P. del Rosario, Junquera ug P. del Rosario, Pelaez-Sanciangko, Salinas Drive, Salinas Drive Extension- Gorordo avenue.

Kuyaw

Nakahisgot na ko sa nahitabo sa anak sa among kauban nga si Boy Panoy, diin ang iyang bugtong anak nga babaye naigo sa side mirror sa usa ka trak, natumba, napantok ang ulo ug namatay. Diha ni mahitabo sa eskina sa P. del Rosario ug Junquera.

Usa niana ka higayon usa usab ka babaye nahagba sa akong atubangan kay nilabang siya kay green ang signal sa pagtabok. Apan mao say pagdesilya sa usa ka van ug naigo siya. Nakuyapan ang babaye.

Sa miaging adlaw, nakapangasaba na sab kog driver nga hapit makaigo og babaye. Unsay tubag sa driver?: “Go man na, miliko ko.” Grabe ka arogante, di ba? Siya pay hapit makaigo og tawo. Pedestrian lane Kining karsadaha di na hapit makita ang linya sa pedestrian lane. Pun-an pa nga wa kay makit-ang traffic enforcer nga mopahunong unta sa mga sakyanan ug mopalabang sa mga tawo. Maihap rang higayon nga nakakita ko nga dunay enforcer.

Di ba ang usa sa mga tahas sa Citom mao ang paghimo sa atoang kadalanan nga luwas, di kay kanang magsige lang og panakop anang mga motorsiklo nga gi-park daplin sa karsada aron lang dunay makamulta?

Maayo tingali nga butangan og mga enforcer kining mga karsada nga kuyaw sa mga pedestrian nga motabok.

Kining karsada duol sa among buhatan sa Sunstar kuyaw kaayo kay ang tawo ug sakyanan magpatentiro.