Someday I’ll be yours

Sa pagpanglupad sa mga abog nga namilit sa nitso ni Rey uban sa paghuros sa hangin, morag nakita ko si Rey nga mikilab nga nahiuban sa mga abog. Malipayon si Rey ug miwara-wara nako. Paghunong sa paghuros sa hangin. Nawala na sab ang mga abog. Ug si Rey wa ko na sab makita. Nabatyagan ko nga migaan ang paminaw ko sa akong pagbati. Nawala ang kabug-at sa akong kasingkasing. Nawala ang akong mga kaguol.

“Salamat, Rey, nga tinguha mo ang akong kamalipayon. Pero sa gikaingon ko na, di tika kalimtan ug kanunay tikang duawon dinhi sa menteryo.”

Piskay kong naglakaw pahilayo sa sementeryo. Dunay pipila ka mga tawo nga nahiabot og nanagkot sa lubong sa minahal nila sa kinabuhi. Tingali wa silay panahon sa pagdagkot niadtong Kalag-kalag. Ug karon lang nakalugar.

Pag-abot ko sa balay, naabtan ko sa sala si Almera. Nakatan-aw ko sa iyang gisul-ob. Nahikatawa si Almera.

“Ayaw na kahibulong, Jean. Gidawat ko na sa hingpit ang pagkawa’a ni Rey. Nia, wa na ko magsul-ob og itom.

Sukad gud sa paghaya ug paglubong ni Rey, kanunay nga itom nga blouse ang isul-ob ni Almera. Gani, niadtong nagkita mi sa sementeryo sa All Soul’s Day, itom man gihapon ang iyang gisul-ob. Unya nakatan-aw ko sa gisul-ob kong bestida. Kolor itom. Itom ang kanunay kong isul-ob sukad sa pagkamatay ni Rey.

“Ikaw, kanus-a man mopadaplin anang itom nga sinina nga kanunay mong isul-ob, Jean? Wa tika but-i, no. But I think it’s about time to accept reality. Ingon gyud ani ang kinabuhi. Di pulos kalipay ang maangkon. Naa gyud nang mga kaguol ug frustrations. But it depend on us to bear it.”

Mipakibo lang ko sa akong mga abaga.

“Nganong nia ka man diay, Al?” Lain ang akong gitubag.

“Aw, personal kong moimbetar nimo. Kaslon na ko sa akong

boyfiend, uy next week.” “Uy, kadali gud. Wa ka man maghisgot ani nako niadtong nagkaestorya ta sa menteryo?”

“Kalit bitaw. Unsaon, buntis na man ko.”

Nahikatawa na lang ko. Sa tan-aw ko kang Almera, tinudanay na gyud ang gibati niyang kalipay aning higayona. Hingpit na gyud tuod siyang nakalingkawas sa pagkabilanggo sa gugma niya kang Rey.