Wanted: Druglord Alive!

Anaa sa ilang listahan sa mga suspetsadong druglord ang ngalan ni Mayor John del Viejo sa lungsod sa Ubgos. Sa iyang opisina sa Cebu Provincial Police Office (CPPO) gibasa ni P/Supt. Col. Roger Mangubat ang search warrant ug warrant of arrest para kang Mayor Del Viejo nga giluwatan sa Regional Trial Court (RTC) nga pinermahan ni Judge Simeon Paredes sa probinsiya sa Sugbo. Naghuwat siya nilang SPO2 Ernesto Ybanez ug SPO1 Israel Lariosa nga maoy iyang tahasan pag-ronda sa balay sa mayor kuyog ang tulo ka ahente sa Philippine Drug Enforcement Agency (PDEA).

“Kinahanglan nga madakpan siya nga buhi!” pintok nga mimando si Col. Mangubat. “Aron atong mahibaw-an ang iyang mga gaway ug ang tinubdan sa ginadiling drugas nga iyang gipayuhot!”

“Yes, Sir! Amo nang buhaton. Dakpon namo siyang buhi!” pasalig ni SPO2 Ybanez.

Nakig-alayon sa barangay kapitan ug sa mga ‘tanod’ ang mga alagad sa balaod sa lugar diin mahimutang ang panimalay ni Mayor Del Viejo.

Diha pa gani sa lagwerta ang mga alagad sa balaod, mipabuto na ang mga sakop sa mayor sa ilang mga armas, timailhan nga nakamatikod na sila sa mga pulis ug andam sila nga mosukol. Naigo ang usa ka ahente sa PDEA. Dali kining gidala sa duha ka ‘tanod’ ngadto sa ospital sa lungsod sakay sa patrol car sa barangay. Dali pod nga nanghipi ang mga pulis sa mga punoan sa kahoy diha sa ilang nahimutangan. Mibawos pagpabuto ang mga pulis. Kadiyot ra ang panagsukliay sa mga bala sa duha ka pundok. Ug

LAMBERTO G. CEBALLOS

Cawayan, Dalaguete, Cebu misapod ang kahilom.

“Mayor Del Viejo, ampo na!” singgit ni SPO2 Ybanez nga migamit sa megaphone. “Way mahitabong dautan kanimo karon kay gitahasan mi ni Col. Roger Mangubat nga dad-on ka sa iyang atubangan nga buhi!”

Sa iyang nahimutangan nanumbalay pagbalik sa panumdoman ni Mayor Del Viejo ang nangagi. Suod nga managhigala sila si Roger ug John. Klasmeyt sila sa elementarya ug sa hayiskol sa ilang lungsod. Sa kolehiyo si Roger didto sa Philippine Military Academy (PMA) sa Baguio City mogradwar pagka sundalo ug mipili nga moalagad sa Philippine National Police (PNP); si John nakatapos sa kurso sa pamalaod sa Central Visayas University sa dakbayan sa Sugbo ug nakapasar dayon sa bar exams. Pagpanglabay sa mga adlaw si John milansar pagka konsehal sa ilang lungsod ug midaog. Sa misunod nga mga eleksiyon pirme siyang midaog isip konsehal hangtod nga milansar siya pagka mayor. Ikaduha na niya nga termino karon. Apan usa na sab siya sa mga narconga gipanggukod sa bag-ong administrasyon.

“Mayor Del Viejo! Nakadungog ka?” misinggit na sab si SPO2 Ybanez nga hugot nga naggunit sa megaphone. “Kon di ka mosurender, mapugos mi pagdala sa imong patayng lawas ngadto kang Col. Mangubat!”

“Oo! Moampo na ko!” tubagsinggit ni Mayor Del Viejo. “Mogawas na ko! Ayaw ko pusila!”

Nakita sa mga alagad sa balaod nga migawas sa pulta mayor sa balay si Mayor Del Viejo. Gipataas niini ang duha ka kamot. Ang tuong kamot naggunit sa kalibre.45 nga pistola.

Unya wa nila damha kalit nga misinggit ang mayor, “Fire!” ug gipunting sa iyang pistola ang gitagoan ni SPO2 Ybanez ug gikablit. Misunod dayon ang mga buto-buto sa mga armas gikan sa sulod sa balay sa mayor tumong sa nahimutangan sa mga pulis.

Kay nakalitan, mibawos ang mga pulis ug ang mga ahente sa PDEA. Naigo ang mayor ug nalup-og sa iyang nahimutangan. Nagpadayon ang butohangtod nga nahilom pagbalik ang palibot. Gisusi sa mga pulis ang sulod sa balay. Tulo ka sakop sa mayor nanghay-ad patay sa salog.

Didto sa estasyon sa kapulisan sa lungsod, miatubang kang Col. Mangubat sila si SPO2 Ybanez ug SPO1 Lariosa.

“Sorry, Sir! Wa namo matuman ang imong mando nga dad-on si Mayor Del Viejo nga buhi sa imong atubangan!” matod ni SPO2 Ybanez.

“It’s okey! Di ko kamo mabasol. Iyang tinuyoan ang iyang kamatayon!” ni Col. Mangubat nga nagpanglingo sa iyang ulo ug nanagudto, “Tsk! Tsk! Tsk! Tsik!”

“Permission to leave, Sir!” matod sa duha ka pulis nga misaludo.

Misaludo pagbawos si Col. Mangubat. (KATAPUSAN)