NAKALUKSO SA KALIPAY

Ang mga katabang sa panimalay dako og ikatabang sa mga pamilya nga ilang gialagaran.

Gumikan sa ilang presensiya, napagaan ang mga gimbuhaton sa mga ginikanan o mga anak sama sa pagbantay sa mga bata, paglaba, paglimpyo sa balay, pagluto o pag-atiman sa mga lolo ug lola o masakiton.

Tungod sa kamaayo sa ubang pamilya, ang ubang mga katabang nilungtad og daghang katuigan.

Agi og pasalamat sa maayo nilang serbisyo, ang ubang mga pamilya mohatag sa insaktong mga benepisyo, bonus panahon sa Pasko, o isuroy sa mga dapit laaganan.

Sama kini sa mga katabang sa pamilyang Cabaero nga nakadawat og pahalipay nga dili makalimtan sa ilang tibuok nga kinabuhi.

Isip pasalamat, sila si Belen Barrera, Beth Tano ug Irene Revalde gisuroy sa mga tourist destination sa Singapore niadtong Oktubre 5 hangtod sa Oktubre 8, 2017. “Gi- treat sila sa akong brother sa Singapore as a way of pasalamat nila for taking care of our parents. Unya gipakuyog ko og apil sa tulo,” asoy ni Nini Cabaero, editor-in-chief sa Sun.Star Exchange.

Ang iyang maguwang nga si Victor Cabaero, retirado nga empleyado ug negosyante sa Estados Unidos maoy nanglibre sa ilang biyahe.

“Nag jump for joy gyud mi, lipay kaayo ming tulo,” matod ni Barrera.

Samtang si Revalde wala na makatulog sa tumang kahinam nga sa unang higayon makabiyahe sa laing nasod.

“First time nako makasakay sa ligid nga molupad, way kabutangan sa kalipay,” sumala ni Revalde.

Sa tulo ka adlaw nila nga bakasyon, sila nanuroy sa Singapore Flyer diin makita ang higante nga ferris wheel; Orchard Road, ang sikat nga shopping street sa nasod diin makita ang mga tindahan alang sa mga mahilig sa fashion; ug Little India, makasaysayanon nga dapit diin makita ang nindot nga komunidad sa India.

Niadto usab sila sa Marina Bay, nahimutang sa Central Area sa Singapore diin makita ang dagko ug nindot nga mga edipisyo ug ubang imprastruktura ug ang Merlion Park diin makita ang iconic nga landmark, ang lawas kay

mermaid ug ang ulo kay lion ug ubang dapit.

Nikaon usab sila sa pambato sa Singapore ang Idiin hapit sila makahilak sa tumang kahang niini. / SCG

TAMPO NGA MGA HULAGWAY SALAMAT: Sa unang higayon, nakasuroy sa Singapore sila si Beth Tano, Irene Revalde ug Belen Barrera uban sa ilang amo nga si Nini Cabaero (nagpuwa). Sila gilibrehan sa maguwang ni Nini nga si Victor Cabaero, negosyante sa Estados Unidos, isip pasalamat...