GREEN, BEAL NAG-AWAY
Nasugakod sa host Golden State Warriors ang ngil-ad nilang duwa sa pagsugod ug sa pagka- ejected ni Draymond Green sa ilang pagpukan sa Washington Wizards, 120-117, kagahapon sa National Basketball Association (NBA).
Ang defending champions nasipyat og 17 sa ilang 20 ka mga itsa sa 1st half unya nawala kanila si Green dihang nakigbugno kini kang Bradley Beal sa nahabiling 19.5 segundos sa halftime.
Ang Wizards kaduha nakamugna og 18 puntos nga labaw sa 3rd quarter una nakabulhot ang opensa sa Warriors.
“We were just awful for 2 1/2 quarters,” matod ni Warriors coach Steve Kerr. “We finally climbed back in it. It took our bench to settle us down.”
Ang layup ni Andre Iguodala gikan sa pasa ni Stephen Curry maoy nakahatag sa Warriors og labaw sa nahabiling 3:13 minutos nga wala na nila buhii hangtod sa pagkapupos sa oras.
Gipangulohan ni Kevin Durant ang kadaugan pinaagi sa iyang 31 puntos samtang nidugang og 20 puntos ug walo ka assist si Curry.
Nakakuha sab og igong suporta ang Warriors gikan sa ilang reserba nga mga magduduwa diin nakatampo si Dathe vid West og 16 ka mga puntos samtang walo ka mga puntos ang nahatag ni Omri Casspi .
“I just thought we got a little bit more aggressive,” pasabot ni West. “We got our composure during that second half.”
Sila si Green ug Beal nagaway ug naglinayugay human kini nag-ilog sa saag nga bola. Niadtong gutloa, daw nahapakan ni Beal si Green ug mibawos si Green hinungdan nga miulbo ang kasamok.
Ang duha ka mga magduduwa parehong na- ejected.
Si Green, kinsa nakadawat sa iyang ikaduhang technical foul, nagkagidlay ang hitsura sa iyang paggawas gumikan kay nagisi ang iyang jersey.
“I thought Draymond defended himself and bit the bullet of being ejected for game,” pasabot ni West.
Sa laing bahin, ang Orlando Magic maoy labing unang nakahugaw sa rekord sa San Antonio Spurs pinaagi sa pagposte og 114-87 nga kadaugan.
Ang Magic, nga gipangulohan ni Evan Fournier pinaagi sa iyang 25 puntos, nakaposte og 36 puntos nga labaw sa 3rd quarter nga maoy labing dako nilang nahimo sa duwa.
“I thought we were sloppy, but they took us out of what we wanted to do, and they did it for 48 minutes,” matod ni Spurs coach Gregg Popovich, kansang Spurs natagak sa 4-1 nga rekord.
“They out-played us in just about every facet of the game.”
Sa lain pang mga duwa, ningdaog ang Houston Rockets batok sa Charlotte Hornets, 109-83, Denver Nuggets batok Atlanta Hawks, 105-100, New York Knicks batok Brooklyn Nets, 107-88, Minnesota Timberwolves batok Oklahoma City Thunder, 119-116, ug Toronto Raptors batok Los Angeles Lakers, 101-82.