'DUMOT' MOTIBO PAGTIPI SA PULIS
KASO SA KABANAY NI PO1 SASING GITUTOKAN SA KAPULISAN
Dumot maoy gitutokan nga motibo sa kapulisan sa dakbayan sa Mandaue kalabot sa pagpamanhig sa babayeng pulis sa dihang paingon mopauli sa lungsod sa Consolacion niadtong Martes sa gabii.
Patay na nga nidangat sa tambalanan si PO1 Mae Sasing, kawani sa Lapu- Lapu City Police Office (LLCPO) ubos sa Public Safety Company ug Quality Section Lane.
Si Sasing paingon na mouli sa ilang balay sa Consolacion atol sa hitabo mga alas 6 sa gabii sa dihang gipusil sa duha ka mga tawo nga nagmotorsiklo sa may Consuello Village, Brgy. Basak, dakbayan sa Mandaue.
Matod ni PSupt. Roberto Alanas nga may kopya na sila sa close circuit television (CCTV) footage sa hitabo apan gikinahanglan pa nila kini nga ipa-enhance.
Mangita sa sab sila og laing mga CCTV video aron masuta kon diin gikan gisundan si Sasing.
“Sa initial investigation namin, merong nakasunod na motor sa kanya but we are trying to establish kung saan nag-start yung pagsunod sa kanya,” ni Alanas sa dihang nahinabi sa mga tigbalita.
Dugang niya nga duha ka mga tawo nga luwan sa usa ka motorsiklo ang ilang nakita sa CCTV video nga nagsunod ni Sasing atol sa hitabo.
Ang mga killer nga padayon pang gitino sa kapulisan parehong nakahelmet atol sa hitabo.
Matod ni Alanas nga base sa ilang imbestigasyon, adunay nakabangi ang policewoman sa ilang barangay.
“May nakaalitan ang kanyang hipag, syempre pulis siya at nag-react siya na humantong sa both party eh nag-file sila ng kaso,” dugang pa sa hepe.
Ang kinihaay sa kaso nahitabo mga duha ka tuig na ang nakalabay, ni Alanas.
Apan giklaro sa brother-inlaw sa policewoman nga si PO2 Ryan Diamada nga nahilot na ang panangbangi niadtong Septiyembre 25 ning tuiga.
Giangkon sab ni Alanas nga wa nila giwagtang ang posibilidad nga may kalambigitan sa trabaho ang pagpamusil apan kini niingon nga dumot gyud ang ilang nag-unang motibo nga susihon.
Paambit sab niya nga isolated case ang kang Sasing ug way kalabutan sa Kalag Kalag.
Gihulagway niya nga planado ang pagpamusil sa biktima.
NAKURAT
Sa dihang gikuhaan ug habig si Diamada, giangkon niini nga nakurat ang tibuok kabanay sa hitabo sanglit namuyo man silang malinawon.
Matod niya nga way siyay laing nailhan nga nakaaway ni Sasing sanglit wa man nalambigit ug pagpanikop ang trabaho niini tuhod kay sa opisina ra man ang trabaho niini.
Malaumon si Diamada nga masikop ang responsable sa pagpusil-patay ni Sasing.
“Unta lamdagan sila (responsable sa krimen) sa saktong panghunahuna. Sakpan man dayon ni. Muhangyo lang mi sa mga nakasaksi nga motabang lang unta sa pag-abag sa kapulisan,” dugang niini.
Si Alanas niingon nga padayon pa nilang gi huwat ang imbestigasyon sa Scene of the Crime Operatives (Soco) kon pila ka samad-pinusilan ang naangkon ni Sasing ug unsang klase sa armas ang gigamit sa krimen.
Nasuta sa Superbalita Cebu nga si Sasing lima ka mga tuig na nga nagserbisyo isip pulis ug may usa ka 7 anyos nga batang babaye.
GIMANDOAN
Hepe sa Police Regional Office 7 mimando sa iyang mga sakop sa Mandaue ug Lapulapu pagpangita sa labing dali nga panahon sa mipusil patay kang Sasing.
Matod ni PRO 7 Director Jose Mario Espino nga wa nay kalabutan sa trabaho ang hinungdan sa pagpusil kang Sasing sanglit nilutaw sa ilang imbestigasyon nga personal ang motibo sa krimen.
“Hindi ito work related. May persons of interest na tayo sabi ko nga parang away ng kapit bahay sa isang lugar,” dugang ni Espino.
Gituohan niya nga gun-forhire ang mga lalaki nga maoy nagpusil kang Sasing. / dugang taho ni AYB