Kolurom van ug pletihan

Tan-awa ra ning mga gahi og ulo nga gusto sab nga mopahimulos sa kahigayonan bisan gidili sa balaod. Nakasabot ta nga usa ka pangayawat man tuod aron makakuwarta, apan bisan unsaon nato og kuwenta usa man gud ka illegal ug pamentaha ang ilang gihimo. Ang gipasabot mao kining nag-operate og mga kolorum nga van nga nagpahimulos sab niining kasaulogan sa Adlaw sa mga Santos ug mga Minatay.

Gipahimatngunan na kini silang daan sa nahitungdang ahensiya apan daw sa ila lang kining gipalapos sa pikas dawunggan.

Kagahapon sa buntag, ang Land Transportation Franchise and Regulatory Board (LTFRB), pinangulohan ni Regional Director Ahmed Cuizon ug inabagan sa Cebu City Police Office (CCPO), nakasikop og usa ka colurom van nga diha namasahero atbang sa Cebu South Bus Terminal (CSBT).

Sa iyang Facebook account, si Cuizon, kinsa miangga og Zombie van sa ilang nadakpan kay lagi atol man sab sa Kalag Kalag, mibutyag nga ilang i-impound ang van ug ipalukat kini og P200,000.

Dili pa igo, suspensuhon pa kini og tulo ka buwan una pa makabiyahe. Tiaw muna. Kadako niining siluta unya dili gihapon ta magpatuo. Maghuwat pa ta og kita na mismo ang madakpan.

Istrikto usab ang LTFRB ngadto sa mga bus de pasaheroan. Ila gibantayan ang overloading nga pagpasakay sa mga pasahero.

Samtang atong gihangop kining gihimo sa LTFRB kay alang man kini sa kaayohan ug kaangayan, maayo sab siguro nga susihon ni sa LFTRB ang overpricing sa plete nga gikuridas na lang sa mga konduktor ug dispatser.

Pananglitan kadtong mga pasahero nga kutob lang sa Minglanilla o Naga dili nila pasakyon kon dili moplete og P40, doble sa gitugot nga pletehan.

Unya bitaw og laing adlaw ilabi na og mingaw-mingaw mao pay manghan�yo. Maayo kaha na?