Paghandum sa mga minatay

Adunay panultihon nga nagkanayon: “Kon ako mamatay, ayaw ako og duawa sa akong lubnganan ug imong pagasultihan kon unsa ko nimo kapinangga ug kon unsa ko nimo gikamingawan. Gumikan kay ang maong mga pulong gustong kong mabati mintras buhi pa ako.”

Kon atong estriktohon pagtuman ang kalendaryo sa Simbahan sa Romano Katoliko, karon nga adlaw ang angayan natong pag-obserbar sa All Souls Day kon Kalag Kalag. Kagahapon mao ang All Saints Day kon adlaw sa mga Santos. Espisyal ang maong adlaw gumikan kay gitagana man kini alang sa atong mitaliwan nga mga santos.

Karong adlawa mao ang adlaw sa atong mga mahal sa kinabuhi o mga ordinaryong tawo. Kon buot natong tumanon karon ang angayan ibisita sa mga sam-ang aron mohalad ug pangadyi, mga buwak ug modagkot ug kandila. Apan kagahapon midagsa ang katawhan sa mga sam-ang labi pa nga wala gideklarar karong adlawa nga pista opisyal.

Ang paghandum sa atong nga minatay gisagop lamang sa Romano Katoliko ug sa ubang nga tinu-uhan apan dili ang tanan. Tulo lamang ka rason nganong ato kining gisagop. Ang kalag sa tawo (kon aduna man gani) tulo lamang ka lugar human siya mamatay. Una, adto siya sa langit o ba kaha sa impiyerno o sa purgatoryo.

Ang kadtong atoa sa purgatoryo maoy angayan natong luwason pinaagi sa atong mga pag-ampo aron mahi-adto sila sa langit. Kay kining purgatoryo mora ni og holding area dili pa ka mahiadto sa langit o ba kaha sa impiyerno.

Apan ngano nga ang ubang relihiyon dili man mo-selebrar sa adlaw sa mga santos ug minatay? Kini gumikan kay dili man sila motuo og mga santos nga gideklarar lamang sa Katoliko. Dili man gani sila mag-selebrar og pista nga pahinungod sa mga santos. Apan kusog kaayong mamista. Ikaduha, dili pod sila motuo nga adunay kinabuhi human kita mamatay dinhi sa kalibutan ug labaw pa nga dili sila motuo nga adunay kalag ang tawo. Human ka mamatay, wala na patay na �yud ka ug ilubong na lang ka kalimot sa imong mga mahal sa kinabuhi.