TAMBAGI KO, NOY KULAS
Di makapahawa
Dear Noy Kulas,
Maayong adlaw. Tawga lang ko sa ngan nga Lin, taga Barili. Ang akong problema bahin sa akong situation karon isip working student ug akong amo.
Tungod sa kawad-on sa akong pamilya, nag working ko sugod sa second year high school. Nag edad ko og 14 samtang nag-working ko sa akong amo. Duha mi ka buok nga nag work nila apan una ko sa akong kaauban.
At first, maayo kaayo sila namo. Pipila ka tuig ang nilabay, nausab sila. Grabe na kaayo sila mangasaba namo. Gamay nga sipyat kasaba dayon. Isip working student, amo rang gisabot sila para lang sa among pangandoy ug sa among pamilya. Tungod kay amo namo sila, amo silang girespito. Hangtud nahuman mi og high school, naa lang gihapon mi sa ilaha. Ganahan na unta mi makalingkawas o mopahawa sa ilaha apan gikwentahan mi sa ilang nagasto.
Sakit sa among buot, Noy Kulas, kay ang among kahago ilang pabayran. Ingnon pa mi nga wala mi ikabawos. Sakit kaayo. Naghago ka ug nagserbisyo nila og tarong apan kwentahan ra diay ka. Hangtod karon naa gihapon mi sa ilaha.
Unsa may angay namong buhaton kay ganahan na mi makalingkawas aning among kahimtang karon kay sa umaabot mograbe na unya. Salamat ug maayong adlaw. LIN Lin,
Way makapugong ninyo kon mamahawa mo kay nagtrabaho man mo nila. Wa mo mamuyo nga nagpalibre kay nagtrabaho man sab mo nila. Wa man mo magmika diha sa ilang balay.
Atong balihon. Kwentahi sila sa inadlaw pud nga kwentada sa inyong trabaho kon nangwenta usab sila ninyo.
Pero kahibawo ko nga di ka makapangutana nila tungod kay mahadlok mo. Diretso na lang mo sa pagpananghid nga manglangyaw na mo kay nahuman na ang inyong tahas sa ilaha. Kon mangwenta, ingna nga inyo man sab nang gitrabahoan. Kana nag-ingon ana na sila aron paghadlok ninyo nga unta di mo angay nga mahadlok tungod kay niuyon man sab sila nga motrabaho mo unya moeskwela. Wa man mo mamugos.
Kon modumili pa sila, dangop na mo sa barangay aron mahilot. Kon mo-demand og bayad, pagpabayad sab mo sa inyong trabaho nila kay kon gipakaon mo ug gihatagan og inadlaw nga allowance, maorag di pa tingali na makabayad sa inyong kahago sa pag-alagad kanila. Kana lang, suwayi ninyo. Basta ayaw mo kahadlok kay wa mo kasalanan nga nahimo, way ilegal.
Alang sa imong problema, e-mail sa kulassuper@sunstar.com.ph ug rojval69@yahoo.com