Forgiveness is not enough
Klaro nga namuwa ang nawong ni Reene sa akong gisulti. Nagkatinan-away og dugay sila si Joyce.
“Bitaw, uy, kon tan-awon mo, no, uyab gyud mo.”
Mikatawa ko. Gipakita ko kanila ni Reene ug Joyce nga nagkumedya lang ko. Inanay nga nawala ang pag-blush sa nawong ni Reene. Nahikatawa sab sila si Joyce. Apan namatikdan nako nga hilaw ang ilang kinataw-an. “Naanad man lang mi nga sweet, Grace, uy. Friendly sweetness lang gud. Unsaon, aside nga silingan mi, barkada sab mi since sa among pagka bata.”
“Bitaw, Grace. Way malisya namo ng among sweetness.”
Miyangu-yango ko. Gingisloan ko silang duha.
“Forget it, uy! Ayaw ninyo hunahunaa tong akong giingon. I’m just kidding.”
Nagkatinan-away na sab sila si Joyce ug ang akong boyfriend. Unya mikupot ko sa bukton ni Reene.
“Mouna lang kog pauli ninyo, ha.” Nananghid ko. Nagkadungag tando ang duha. “Ihatod tika, Grace.” “Ayaw na lang, Reen.” Hinay kong mibiya sa duha. Sa didto na ko sa layu-layo, mihunong ko ug gilingi ko sila si Reene ug Joyce. Nagtan-aw sila nako. Sukad ganina, gikulbaan na ko sa nakita kong sweetnes nilang duha. Misamot ang gibati kong kakulba. Morag nagduda gyud ko sa ilang mga lihok. Sa hilom, nakaingon na lang ko nga unta nasayop ko sa akong pagduda nga duna silay relasyon.
Pagka gabii, human ko makapanihapon, mihigda na ko. Gikapoyan ko. Gawas pa, klase na ugma. Gusto kong mopahuway og sayo. Apan nag-alindasay ko sa akong higdaanan. Sila si Reene ug Joyce ang akong nahunahuna. Di mawala sa akong kaisipan ang akong nakita nilang duha. Kadlawon na kong nakatulog. Bisag sa laing university nagtungha si Reene, apan mokontak gyud siya nako sa selpon.
Apan human ko sila makita si Joyce nga very sweet sa usag usa, wa na siya magpadalag
love messages nako. Misamot ang akong pagduda.
Usa ka gabii nga namisita si Reene nako, wa na gyud ko makapugong sa akong kaugalingon.
“Tell me the truth, Reen. Unsay real score ninyo ni Joyce?”
Dugay nga mitubag si Reene. Miduko siya. Klaro nga naghunahuna siya pag-ayo. Mikusog pagbutuk-butok ang akong dughan. Kahilakon ko.
“Sultihi ko sa tinuod, Reene. Uyab mo si Joyce, no?”
Mitan-aw si Reene nako. Puwerte niyang seryusoha. (SUMPAYAN)