Ang larawan sa lubong

Alas tres sa hapon, Nobiyembre 2, adlaw nga Biyernes. Mao gyud ni ang petsa nga gipahinungod sa mga kalag sa nangamatay nang mga minahal sa kinabuhi. Mao sab ni ang adlaw nga moduaw si Melito sa lubong sa iyang asawa nga si Gila nga mitaliwan lima na ka tuig ang nakalabay. Gidumdom niya ang nitso ni Gila sa laray sa mga nitso sa Sto. Rosario sa sementeryo sa Carreta, dakbayan sa Sugbo. Human niya dagkuti ang tulo ka kandila iya kining gipahiluna sa butanganan diha sa atubangan sa nitso ni Gila. Ang pinalit niya nga mga bulak nga gisulod sa duha ka lata iyang gibutang sa masigka kilid sa nitso. Ug mipahinungod siyag pag-ampo alang sa kalinaw sa kalag sa minahal niyang asawa. Trayintay singko na iyang edad, Ka-edad niya si Gila.

Unya nadani ang iyang atensiyon sa larawan sa nitso nga tupad sa nitso sa iyang asawa. (May larawan sab si Gila sa nitso niini.) Matahom ang panagway sa babaye nga diha sa larawan. Nahinumdom siya nga sa miaging tuig wala pay larawan ang maong nitso. Ang larawan gisandig sa lapida ug nasulod sa daw hawla nga mga rehas. Gitutokan niya pag-ayo ang larawan usa siya manamilit sa lubong ni Gila.

Didto sa ‘gate’ sa sementeryo kalit mikuba-kuba ang dughan ni Melito, Nasugatan niya ang usa ka babaye nga kamay-ong sa panagway sa larawan sa lubong tupad sa nitso sa iyang asawa. Itom ang sinina sa babaye. Nahitalunong siya ug wa makalihok. Gisundan sa iyang panan-aw ang babaye nga nagbitbit og mga kandila ug pungpong sa mga bulak. Multo kaha to? Ug siya ang gipakita kay puwerte man niyang tutok ganina sa larawan kay nadani siya sa kaanyag sa babayeng patay na? May nahunahunaan siya. Mipalit siyag duha ka kandila ug nagdali nga mibalik sa lubong sa iyang asawa.

Nakita niya ang babaye nga nagduko tungod sa nitso nga tupad sa iyaha ni Gila. Tingali nangadye. Nagsiga pa ang mga kandila nga gidagkutan niya kaganina sa nitso sa iyang asawa. Gidagkutan niya ang bag-o niyang pinalit nga mga kandila ug giugbok. Unya mitindog siya.

“Pardon me, Miss, imo siyang kaluha?” ni Melito nga mitan-aw sa babaye dayon ngadto sa larawan sa lubong.

“Ako siyang Mama, Sir,” sa babaye nga lawom og tinutokan kang Melito.

“Abi nakog kaluha mo. Parehas gyud mog hitsura!”

“Bitaw, Sir. Sa buhi pa siya kon mangadto mi sa Mall o manimba ba, saypan gyud mi nga kaluha. Matod pa nila, parehas mi sa pinikas nga mansanas,” sa babaye nga mipahiyom nga mitan-aw sa nitso ni Gila. “Imo siyang asawa, Sir?”

“Yes. Lima na ka tuig siya dinhi,” ni Melito. “Kumusta imong papa?”

“Buhi pa siya. Tua siya sa Davao puyo uban sa iyang ikaduhang pamilya.”

“Dia ka magpuyo sa Cebu?” ni Melito.

“Yes. Ako ug ang akong Lola, inahan ni Mama. Kami maoy nagpuyo sa balay sa akong Mama ug Papa. Naa sa Zapatera,” sa babaye.

“Tabi, unsa diay imong ngalan?” ni Melito. “I’m Melito. 35.”

“Si Lalaine ko. 25 edad. Still single,” sa babaye nga nagpahiyom. Unya nanguros kini atubangan sa nitso sa iyang inahan. “Adto na ko, Ma. Naghuwat si Lola nako sa balay.”

“Unhan tika, Sir, ha?” ni Lalaine ngadto kang Merlito.

“Kon di nimo ikasuko, ihatod tika sa inyo,” ni Melito. “May sakyanan ko sa gawas.”

Mitutok pag-ayo si Lalaine kang Melito, kayha nagduda sa iyang pagka tawo.

“Di ka angay mahadlok nako, Lalaine. I’m a good man,” ni Melito.

“Okey. Take me home, Melito,” ni Lalaine.

SAMTANG nagdagan ang awto ni Melito, karon ug unya, mopasiklap siya sa dalaga nga diha sa iyang tupad. Sa uwahi niyang paglingi misigag dako ang iyang mga mata. Di na si Lalaine ang iyang tupad, kun dili usa ka kalabera nga nagsul-ob og itom nga sinina. Kalit gitumban niya ang preno sa awto. Dayon nawad-an siya og panimuot. Pagbalik sa iyang maayong panimuot may mga tawong nag-alirong sa iyang sakyanan nga nabangga sa poste apan dili kaayo grabe ang impak. “Maygani kay naka-brake siya. Kon wa pa, patay siya!” maoy iyang nadunggan. Milingi siya sa tuo niyang kilid. Wala na niya makita si Lalaine. (KATAPUSAN)