‘GUARDIAN’ MIBANSAY SA 4 BARANGAY
Gibansay sa SugboTek ang mga kawani sa upat ka mga barangay sa dakbayan sa Sugbo nga mag-una alang sa pilot execution sa mobile emergency response application nga Guardian.
Gipili sa mga kapitan sa Apas ug Santo Niño sa amihanang bahin, ug ingon man usab sa Tisa ug Poblacion Pardo sa habagatang bahin, ang ilang mga sinaligan nga maoy modala sa
emergency dispatch center sa ilang masigkabarangay.
Nagtapok sila sa Apas Barangay Hall diin ang mga enhinyero sa SugboTek migiya nila sa mga pamaagi, lakip na ang mga dapat nga mga protocol nga gisagop sa 911 Emergency sa Estados Unidos.
“Mahinungdanon nga nakigbahin ang mga kawani sa talagsaong mga protocol nga iya lang sa Guardian,” miingon si Cloyd Dedicatoria, managing director sa SugboTek nga mimugna sa mobile app sulod na sa upat ka tuig.
Magpadayon ang pagbansaybansay uban na sa pagpangamot na sa mga computer ug kahimanan sa komunikasyon nga ipahimutang na unya sa upat ka mga barangay.
Sa dili madugay, bisan si kinsa sa Sugbo nga maka-download unya sa Guardian app gikan sa Google Play ug ma-install sa ilang mobile phones mamahimong makasangpit og pakitabang kung may emerhensiya nga mahitabo.
Sa usa lang ka tuplok sa telepono, maalinggatan gilayon ni sa Guardian kansang operator sa pinakaduol nga dispatch
center mao pa’y manawag sa nagpakitabang – krimen, sunog, disgrasya o medikal nga emerhensya.
Ginamit ang global positioning system, kon GPS, makahibalo ang Guardian operator asa nahimutang ang nanawag gamit ang Google Map, ug makita pa gani ang palibot gamit ang street view sa Google Earth nga makapasayon ug makapapaspas sa koordinasyon. Bisan kung wala’y internet connection o load ba sa mobile data, basta aduna la’y intranet wifi ang dapit sama sa Barangay Apas ug sa usa ka dakbayan sa Metro Cebu, mamahimong ma-access sa mga mogamit ang Guardian.
Gani, magamit ang Guardian panahon o’ human sa paglabay sa sa katalagman sama sa makusog nga bagyo o’ linog nga makapapukan sa kuryente kay makapahimutang man ang Guardian og mobile transmitter nga may mga generator pa kini ug mga solar panel.
Gitiman-an ni Dedicatoria ni’ng bag-o pa lang ang memorandum of agreement uban nila kapitan Ramil Villena Ayuman sa Apas, Pancho Ramirez sa Santo Niño, Altea Recuya Lim sa Poblacion Pardo, ug Phillip Sabior Zafra sa Tisa alang sa pilot execution.
Mipirma sab si Konsehal Zafra, isip pangulo sa Association of Barangay Councils (ABC), og laing memorandum of understanding diin ang ABC mopa-apil pa sa dugang nga mga barangay kung mapubliko na ang Gaurdian karong Enero 2018.
Libre ang Guardian sa tanang mogamit unya niini.