GIKASTIGO OG SAYO

Sayo nga gipabulhot sa Oklahoma City Thunder ang ilang opensa aron kastiguhon ang host Milwaukee Bucks, 110-91, kagahapon sa National Basketball Association (NBA).

Gikan sa 4-8 nga biya, ang Thunder ningmugna og 16-0 nga rally aron pagposte og 20-8 nga labaw sa nahabiling 4:16 minutos sa 1st quarter ug gikan niini, wala na sila molingi pagbalik.

Ang pagbulhot sa opensa sa Thunder gipangulohan sa ilang kaugalingong Big Three nga sila si Paul George, Carmelo Anthony ug Russell Westbrook.

Si George nagpakatap og 20 puntos, nidugang og 17 puntos si Anthony diin walo niini iyang namugna sa 16-0 nga rally sa Thunder samtang diriyot na sab nakahimo og

triple-double si Westbrook, kinsa niamot og 12 puntos, 10

rebounds ug siyam ka assists. Ang Thunder ug Bucks pareho nan’g naggunit og 4-3 nga rekord.

Maayo sab nga nakaduwa alang sa Thunder sila si Jerami Grant ug Steven Adams. Si Grant nipupo og 17 puntos samtang nitampo og 14 puntos ug 11 rebounds si Adams.

Ang Bucks gipangulphan ni Giannis Antetokounmpo pinaagi sa iyang 28 puntos.

PACERS 101, KINGS 83

Sa Indianapolis, gipangulohan ni Bojan Bogdanovic ang balanseng ataki sa Indiana Pacers sa ilang dakong kadaugan batok sa Sacramento Kings.

Sa halftime, ang Pacers nakaposte na og 55-30 nga labaw ug wala na kini molingi pagbalik.

Si Bogdanovic nimuga og 17 puntos samtang niamot og 16 puntos si Domantas Sabonis alang sa Pacers.

Ang Kings gipangulohan sa ilang rookie guard nga si De’Aaron Fox pinaagi sa iyang 18 puntos.

SUNS 122, NETS 114

Sa New York, nagpauwan og 32 puntos si Devin Booker samtang nitampo og 24 puntos si Mike James aron pangulohan ang kadaugan sa Phoenix Suns batok sa host Brooklyn Nets.

Nakatabang sab og dako sa kadaugan si T. J. Warren, kinsa nimugna og 20 puntos diin 14 niini iyang gihimo sa 4th quarter.

Ang Nets gipangulohan ni D’Angelo Russell pinaagi sa iyang 33 puntos samtang nihatag og 21 puntos si Hollis-Jefferson.

LAKERS 113, PISTONS 93

Sa Los Angeles, balanse sab nga opensa ang gihimo sa host LA Lakers aron ipanglampornas ang Detriot Pistons.

Gipangulohan ni Julius Randle ang Lakers pinaagi sa iyang 17 puntos, nihatag og 14 puntos si Larry Nance Jr. samtang nihatag og 13 puntos matag usa si rookie Lonzo Ball, Brandon Ingram ug Kentavious Caldwell-Pope.

Ang Pistons gipangulohan nila ni Tobias Harris ug Reggie Jackson pinaagi sa ilang 18 puntos matag usa.

AP PHOTO ■ DEPENSA: Nangita og paagi si Oklahoma City Thunder forward Carmelo Anthony (tuo) ning aktuha aron lutsan ang hugot nga depensa ni Giannis Antetokounmpo sa Milwaukee Bucks kagahapon sa ilang duwa sa NBA. Nanginit dayon ang opensa sa Thunder aron...