Forgiveness is not enough
Unya, dugay kong gitan-aw ni Reene. Misamot nga gikulbaan ko kay dugay siyang nakatubag sa akong gipangutana niya. Gusto na gyud kong mohilak kay gilainan ko sa akong gibati niadtong tungora. Morag nagkadako ang pagduda ko bahin nilang duha ni Joyce.
“Ayaw pamakak nako, Reene.”
Lawom kaayog panghupaw si Reene. Hapit ko na lang pugngan ang akong pagginhawa. Ambot ba sab, uy, nganong nahasol man gyud ko ning sitwasyona? May dako man unta kong pagsalig sa akong boyfriend. Aw, siyempre gawas nga love ko siya maong ako siyang gisugot, uban na ani ang pagsalig ko niya.
Apan naunsa man ko ron? Gibati gyud nako ang insecurities.
“Ugma, Grace, makig- lunch mi si Joyce nimo. Kaming duha ang motubag anang imong gustong pakisayran nako.”
Hapit di madungog ang tingog ni Reene tungod sa kahinay. Unya, nanghupaw siyag lawom. Misamot ang akong pagtuo nga dunay gitago sila si Reene ug Joyce nako.
“Nganong kamo man gyung duha, Reen? Puwede man ko nimong tubagon nga bisag wa si Joyce.”
“May nang naa ming duha sa imong atubangan, Grace.”
Nahibulong gyud ko sa linihokan ug sinultihan ni Reene karon. Mipauli na lang siya apan wa gyud nako siya mapugos sa pagpatubag sa gusto kong mahibaw-an niya. Dugay gyud kong nakatulog niadtong gabhiona. Nahasol gyud ko, uy. First love ko si Reene. Para nako, true love gyud ang gibati ko niya.
Pagsulod nako sa Jollibee sa Colon nga maoy gikasabotan namong magkita, diha na sila si Reene ug Joyce. Seryuso kaayo silang nagtan-aw nako. Duna nay mga pagkaon ug drinks sa ibabaw sa lamesa nga ilang nahimutangan. Milingkod ko sa ilang atbang. “Mangaon sa ta, Grace.” Miagda si Reene. Igo ko lang gitan-aw silang duha si Joyce nga nangaon. Wa koy ganang mokaon. Miinom lang kog gamay sa drinks sa akong baso. Nakasabot tingali sila si Reene ug Joyce nako. Miundang lang dayon sila sa ilang pagkaon. Human sila makainom sa ilang softdrinks, nagtinansilang duha. Unya, mitan-aw sila nako. “Di lang kay childhood friend mi si Joyce, Grace, kondi childhood sweetheart pa gyud mi.”
Mikusog pagkuba ang akong dughan. Dugay kong gitutokan si Reene. Nagduko lang si Joyce.