‘HITMAN SA DRUG LORD MISUKOL’, NAPATAY

MGA PULIS MI-SERVE OG WARRANT SA MALABUYOC

Namatay ang giingong hitman sa usa ka drug lord human nisukol sa mga pulis dihang gironda kagahapon sa alas 4:50 sa kaadlawon sa Sitio Libo, Brgy. Sardenya, lungsod sa Malabuyoc, Sugbo.

Si Emerito Cardente, 53, taga Brgy. Tumoroy sa mao nga lungsod, namatay human giingong nakigpinusilay sa kapulisan pinanguluhan ni Supt. Joie Yape, Jr. hepe sa Provincial Intelligence Branch (PIB) sa Cebu Provincial Police Office, uban sa Ronda Police, Moalboal Police, Malabuyoc Police ug Provincial Public Safety Battalion.

Si Sr. Supt. Edgar Alan Okubo, director sa CPPO nga nahinabi sa mga tigbalita, nagkanayon nga gi- serve sa iyang mga sakop ang warrant of arrest sa kasong murder batok kang Cardente nga giisyu ni Judge Leopoldo Cañete sa Regional Trial Court (RTC 7) Branch 60 sa lungsod sa Barili.

Sumala pa niini nga si Cardente maoy hitman sa namatay nga drug lord nga si Christian Aquino.

Gibutyag niya nga mokabat sa usa ka buwan ang pag- monitor sa iyang mga sakop batok kang Cardente, kinsa nagtago sa balay ni Aquino uban ang laing suspetsado nga si Roberto Palabon, 50, taga Brgy.Sardenya.

Si Cardente maoy responsabli sa pagpatay kang PO3 Fabio Fernandez ug PO1 Almasid Jimlani, sakop sa Moalboal Police, niadtong Nobiyembre 14, 2014 nga gipamusil sa ilang operation sa Brgy. Tumonoy, Moalboal.

Si Yape nibutyag nga si Cardente most wanted sa provincial level sa Sugbo kay usa kini ka gun-for-hire.

Dihang gi- serve ang warrant, mga pulis gipamusil hinungdan nga nahitabo ang pinusilay.

Naigo si Cardente kinsa gidali pagdala sa Malabuyoc hospital apan dead on arrival.

Matod ni Yape nga si Palabon buot unta nga mo- surrender atol sa pag- raid apan gihimo siyang taming ni Cardente hinungdan nga naigo sa tuong kamot.

Si Chief Insp. Jose Rovic Villarin, hepe sa Moalboal Police, nagkanayon nga si Cardente maoy responsabli sa pagpusil patay sa mabdos nga si Susana Tabanao Mortal sa Brgy.Tumonoy human gipasanginlang maoy nitug-an sa pulis hinungdan nga na- raid. /