19 anyos patay sa gang war sa Lapu-Lapu

Patay ang usa ka 19 anyos nga lalake samtang anaa sa kritikal nga kondisyon ang usa ka menor nga naigo sa saag nga bala atol sa gang war sa F. Martir St., Brgy. Poblacion, dakbayan sa Lapu-Lapu niadtong Miyerkules sa gabii.

Giila ang namatay nga biktima nga si Raymart Primacio, 19 , delivery helper, taga Purok Kinalumsan, Brgy. Gun-ob sa dakbayan ug ang kuyog nga talandugon ang kahimtang mao si AJ Sarino, 13, taga Sitio Langub sa maong barangay.

Ang mga suspek kinsa giingong mga miyembro sa grupong “Thugs Familia” giila nga sila si Ryan Sohan, alyas King; John Ryan Calo; ug Kevin Abangan nga pulos taga Brgy. Looc.

Base sa imbestigasyon sa Crimes Against Persons Unit sa Lapu-Lapu City Police Office (LLCPO) nga atol sa hitabo niabot sa auditorium si Primacio diin adunay disco.

Usa sa mga higala ni Primacio nisumbong kanila nga gikulata siya sa grupo sa mga batan-on pipila ka minutos ang nakalabay maong gikomprontasi ni Primacio ang grupo ni Sohan ug didto nahitabo ang komosyon.

Nisuway pa og uwang ang mga nakasaksi sa hitabo apan si Sohan nibunlot og armas sa iyang hawak ug nipusil kang Primacio.

Si Sarino, sa laing bahin, kinsa nagtindog gawas sa internetan duol sa crime scene, naigo sa saag nga bala sa iyang tiyan.

Sa dugang pakisusi ni PO3 Joseph Cutanda, gitiwasan pa og pusil ni Calo si Primacio apan wa makaigo samtang gidunggab sab sa may lubot nga bahin ang biktima ni Abangan.