LTFRB 7 moresulbar sa petisyon sa di pa mohimo og recalibration sa taxi meters
Resulbahon una sa Land Transportation Franchising ang Regulatory Board (LTFRB) ang petition sa pundok sa mga operator nga wala mouyon sa umento sa plitehan sa taxi sa dili pa sugdan ang calibration sa mga metrohan.
Si LTFRB 7 Director Ahmed Cuizon nibutyag nga niduso og petition for exclusion ang grupo sa mga taxi operator sa siyudad sa Cagayan de Oro nga dili gusto maapil sa pagsaka sa plitehan sa taxi.
“Hadlok sila nga wa na unya kunoy manakay sa ilang mga taxi,” sumala sa direktor. Matod niya dili sila makasugod sa calibration sanglit nagpaabot sila sa memorandum circular nga luwatan sa ilang central office.
“In previous increases man gud, naa MC, karon, wala pa,” dugang ni Cuizon sa chat message sa Superbalita Cebu. Siya niingon maisip nga undercharging ug ilegal kon dili mosunod sa bag-ong plitehan sa taxi ang mga operator sa Cagayan de Oro City.
Sa desisyon niadtong Oktubre 4, ang LTFRB nitugot nga himuong permanente ang P40 nga flag down rate sa taxi.
Sa maong desisyon, ang pasahero mobayad na og P13.50 alang sa matag kilometro nga biyahe ug P2 matag minuto alang sa waiting time gikan sa gigikanan hangtod sa destinasyon.
Moepekto kini 15 ka adlaw human mapublikar sa mantalaan. Apan hangtod karon wala pa moluwat og memorandum circular ang nasudnong buhatan sa LTFRB aron masugdan ang calibration sa mga metrohan sa mga taxi.
Sa kasamtangan, P40 ang flag down rate, dugang P10.50 alang sa mosunod nga 900 metros samtang P3.50 sa matag duha ka minuto nga waiting time.