Buhatan sa Comelec Mandaue ibalhin sa luyong bahin sa sports complex

Di na maglisod ang mga senior citizen ug persons with disability (PWD) sa dakbayan sa Mandaue kon magparehistro sa Comission on Elections.

Kini kon hingpit na nga mahuman ang pagbalhin sa maong buhatan gikan sa 2nd floor sa luyong bahin sa sports complex ngadto na sa ground floor. Matod ni Mayor Luigi Quisumbing nga nakadawat siya og mga reklamo gikan sa mga senior citizen ug PWD nga maglisod pagsaka sa ikaduhang andana sa luyong bahin sa Sport Complex diin nahimutang ang buhatan.

Gani, may mga kaso nga ang ubang mga senior ug PWD nga naka- wheelchair, strechers ug crunches alsahon pa aron nga makasud sa buhatan sa Comelec. Ang pagparehistro sa mga PWD ug senior citizen sa Mandaue gikinahanglan aron nga kini makakuha og financial assistance sa dakbayan.

“In the old place man gud we’ve received a lot of complaints through the years nga maglisod sa pagsaka ang mga PWDs ug senior citizens kay not only it was in the second floor, it was also quite steep,” matod ni Quisumbing.

Kini maoy hinungdan nga gipabalhin sa mayor ang buhatan sa Comelec sa ubos.

“We would like to make sure the PWDs and senior citizens will not be having a difficult time in going to register,” matod sa mayor.

Paambit niya nga way dugang gigasto ang kagamhanan sa dakbayan sa renovation sa luyo sa sports complex ug ang City Engineering Office maoy nihimo sa renovation.

Gawas sa pagbalhin sa maong buhatan, pabutangan sab ni Quisumbing og ramps ang gawas sa maong buhatan aron di maglisod og sud ang mga naka- wheelchair.

Malaumon ang mayor nga mahuman ang pagtukod sa buhatan sa Enero 2018.