Nagbaligya sa dungog
Daghan tuod og tourist destinations kining atong nasud. Apan ang ubang mga turista labi pa mga lalaki, di ang mga tourist attraction ang ilang gi-anhi, kon dili ang atong kababayen-an. Dili pag-unsa o pagdaut sa atong mga kababayen-an apan daghan kanila ang nagbaligya sa ilang dungog ngadto sa mga langiyaw. Imong makita kini sila diha sa mga kadalanan o mga hotel ug motels nga nagkuyog-kuyog oug mga foreigner.
Niadtong miaging adlaw, usa ka 66 anyos nga Danish national (taga Denmark) ang gidakop sa mga awtoridad human kini makit-i nga nagdala og usa ka meoor de edad nga babaye sa usa ka beach resort sa barangay Estaca, Compostela.
Bisan og wala sila maaktuhi nga naghimo og malaw-ay nga binuhatan apan mag-unsa man sila didto sulod sa lawak nga ilang gi-abangan? Alangan man og mag-rosaryo sila didto.
Mag-atubang ang maong langiyaw og kasong kalapasan sa human trafficking pinasikad sa Republic Act 7610 o Special Protection of Children’s Against Abuse, Exploitation and Discrimination Act. Nagka-ila ang maong langiyaw ug ang dalagita sa usa ka on-line dating site.
Gi-imbitar sa langiyaw ang babaye nga mangaligo sa beach resort ug nikuyog usab ang dalagita.
Aber, nganong mikuyog man usab dayon ang maong babaye? Gumikan kay aduna pod siyay plano ug natintal siguro sa kuwarta. Mao nay akong gi-ingon nga daghan kaayo diha sa atong kababayen-an nga nanginabuhi sa ingon niini. Dimalas lang ang maong langiyaw kay usa ka minor de edad ang iyang nadate nga dakong kalapasan sa atong balaod.
Kanang cyber pornography diin gi-apil sa mga ginikanan ang mga inosente nilang mga anak, unsa man usab ang tumong niana? Aw, mao gihapon kuwarta ra. Mao nga subo kaayong paladungon nga ang pipila nato ka kababayen-an misulod ning maong matang sa panginabuhi gumikan lang sa kawad-on. Masulbad pa kaha kining maong matang sa problema sa atong katilingban?