Forgiveness is not enough

Nakamatikod si Mama sa akong mga kaguol. Nagsige siyag tan-aw nako usa ka gabii nga nanihapon mi uban kanila ni Papa ug sa duha ko ka mga manghod. Tulo ra mi ka magsuon ug ako ang kamagwangan.

Parehas sa naandan na sukad nga nagkabuwag mi si Reene, gamay na sab ang akong gikaon. Miundang dayon ko ug nananghid sa akong parents nga mosulod na ko sa akong kuwarto.

Sa sulod sa akong kuwarto, misandig ko sa headboard sa akong kama. Naghingushingos ko kay kahilakon na sab ko. Unya naabli ang pultahan sa akong kuwarto. Misulod si Mama. Milingiw ko niya ug dali kong gipahiran ang akong mga mata sa akong palad kay mitulo gyud ang akong mga luha.

Milingkod si Mama sa ngilit sa akong kama duol nako. Iyang gihapuhap ang akong buhok. Ingon gyud ani ang iyang buhaton nako kon duna siyay gikabalak-an nako.

“Sultihi ko sa tinuod, Grace Unsay imong problema?”

Migakos ko kang Mama. Mibakho ko sa iyang dughan. Ug sa putul-putol kong tingog, gitug-anan ko siya sa tanan. Gihapuhap ni Mama ang akong buku-buko. Nabatyagan ko ang iyang pagpangga nako.

“Ingon gyud ani ang gugma, Grace. Di sa tanang panahon kalipay ang atong maangkon. Di gyud kalikayan ang frustration sa love.”

“Sakit kaayo ang gibuhat nila ni Reene ug Joyce nako, Ma. Gikasilagan ko sila.”

Namatngonan ko ang grabeng kasuko nga akong gibati. Mihuot pag-ayo ang akong dughan sa gibating kasilag kanila ni Reene ug Joyce.

“Ayaw pagbaton anang pagbatia, Grace. Sukad pa sa sinugdanan gitudloan ka na namo ni Papa mo sa pagka mapaubsanon, sa di pagdumot sa atong isig ka tawo. Gitudloan ka namo sa paghatag og pasaylo sa nakasa’a nato.”

Naghingus-hingos ko. Namahid ko sa akong mga mata sa akong palad. Mibuwag ko paggakos kang Mama ug misandig kog balik sa headboard sa akong kama. Naghilom ko. Husto man sab si Mama.

Gitudloan ko nila ni Papa sa mga pagtulun-an nga gipasunod ni Kristo. Kanunay silang nagtambag nako sa mga maayong buhat ug kinaiya.

“Sige, katu’og na, Grace. Di si Reene ang laki nga para nimo.”

Gisundan ko sa pagtan-aw si Mama nga migawas sa akong kuwarto. (TAPUSON SUNOD GULA)