Uban sa grasya , pagkugi
Ako si Ma. Neonita Gamalo, lumulopyo sa Brgy. Cansibao, Valencia, Bohol. Usa lang ako ka kabos nga nakigbisog sa pagpaningkamot nga moabot sa unsa nay akong kahimtang karon.
Usa ka habal-habal drayber ang akong bana ug mopanday pud siya og mga balay. Apan kay lagi mao ray panginabuhian, kulang gyud ang unsay iyang makita alang kanako ug sa upat namo ka mga anak.
Kini ang hinungdan maong nagsugod ko og negosyo sa ginagmayng sud-an ug snacks nga isuroy-suroy nako sa mga balay-balay aron lang makasuporta sa among pamilya.
Tungod kay maayo man sab mogama og furniture akong bana, nakahunahuna mi nga moapil sa Micro-finance nga programa sa Ramon Aboitiz Foundation Inc. aron aduna kamiy kapital aron makasugod sa maong negosyo.
Sa kaluoy sa Ginoo, sa sige namo og loan, nakapalit kami og second-hand nga chainsaw nga nakatabang namo nga makahimo og lahi-lahi nga desinyo. Tungod niini, nidaghan ang among mga kustomer.
Tungod kay naa na man kamiy furniture shop, sa ngadto-ngadto nakatigom ug nagmalambuon ang among pagpuyo. Nakapahuman gyod ko sa akong tulo ka mga anak sa kolehiyo. Ang kamagwangan nakahuman sa kursong criminology ug pulis na karon; ang duha parehong nakahuman sa kursong Bachelor of Science in Marine Transportation ug pareho karong nakasakay ug nagtrabaho sa barko nga international nga biyahe.
Dako gyod ang among kalipay sa akong bana kay ang among tulo ka mga anak na ang nagpaeskwela sa ilang manghod, nga nagkuha karon og kursong Aircraft Maintenance.
Nagpasalamat gyod ko sa Ginoo kay wala gyod mi niya pasagdi. Wala gyud ko magbasol nga mang-loan kay nahimo man kadtong taytayan aron kami makasugod sa among negosyo.
Ang maong grasya giubanan lang gyud namo og tumang paningkamot maong kini wala nakawang.
Akong ikatambag sa uban mao nga mag-ampo lang gyud sa kanunay ug ubanan kini sa pagkugi.