Mga tanod iposte bisan outposts giguba
Magpadayon sa pagtunol sa batakang serbisyo ang Barangay Ermita labi na sa pagpatuman sa kahapsay ug kalinaw taliwa sa pagguba sa Cebu City Government sa ilang pito ka mga barangay tanod outpost.
Si Kapitan Felicisimo Rupinta nagkanayon iyang hulipan og mga bangko ang giguba nga mga outpost aron adunay kapundohan ang mga tanod ug adunay dali nga masangpit ang mga residente kinsa mangayo og tabang.
Si Mayor Tomas Osmeña nibutyag nga iyang gipaguba ang mga outpost sanglit anha ra magpuyo ang mga tanod kinsa nagsilbing hulga sa mga vendor pinaagi sa pagkolekta og P10 nga “voluntary donation” matag adlaw.
Apan matod pa ni Rupinta nga way pugsanay ang paghatag.
Ang mga tanod naghatag og seguridad sa mga tawo, diin nimenos na ang snatching ug ubang matang sa pagpangawat.
Menos na usab ang patay gumikan sa presensiya sa tanod.
Wa naguol ang kapitan sa pagguba sa outpost apan ang iyang gikabalak-an nga mabasa ang mga tanod kon maguwan ug mabuwad usab sa init sanglit wa na silay atop.
HONORARIUM
Gitug-an ni Rupinta nga ang ilang koleksyon nga tag P10 gikan sa mga vendor maoy ilang gikuhaan sa pagpalit og mga piyesa para sa ilang mga garbage
truck nga maguba ug ubang mga emergency vehicle.
Matod niya, kon ang kwarta sa barangay ilang kuhaan, maabtang og siyamsiyam ang proseso ug di sila makabuhat sa ilang trabaho sama sa pagkolekta sa basura diin ang Carbon moy adunay labing daghan og hugaw.
Mao sab kini ang gikuhaan og tag P2,000 nga honorarium sa 49 ka mga tanod, garbage loaders ug collectors ubos sa ilang Economic Enterprise Department. Ang pagkolekta og P10 way resibo.