Makalibog nga motibo sa pagpatay?

Kon balikbalikon ang estorya nga kanunay magkita si PO1 Mae Sasing sa kanhi hinigugma nga si Felix Taytayan, di ba morag bati paminawon alang sa biktima?

Si Taytayan, kinsa suspek sa kamatayon ni Sasing, natanggong na karon human napasakaan og kaso.

Nganong makigkita pa man si Sasing kang Taytayan sa daghang higayon kon gibalibaran na nga makig-uli.?

Ang teyoriya sa kapulisan si Sasing ang nagpatay kay matud pa, nagsigig hulga sa pulis kay di makig-uli. Di ba makalibog? Unsa pa may uli-on kay duna man kahay mga higayon nga magkita ang duha bisag gibalibaran na ang suspek?

Akong punto, makakuha og lig-ong ebidensya ang kapulisan batok sa suspek. Sa tuyo aron matagaan og hustisya ang pamilya sa namatay.

Di kita mosugot ang tuyo sa pagdalidali sa pagsulbad sa kaso kay napresyur ang kapulisan apan huyang ang ilang mga ebidensya.

Bitaw, karong panahuna dali mahimo ang pagpakasala kay mahimo naman nimong kuhiton aron palamian bisag layo ginamit ang social media. Hinuon, tawo ra man ta nga makasala. Kana kon magpatintal. Apan wa magpasabot sa pagpanguwag sa tawo nga miresulta sa pagpapatay wa nay tulubagon sa krimen nga iyang gihimo.

PATAY NA SI MAMA

Human sa pipila ka tuig nga pagpanaw sa laing kalibotan sa akong amahan. Karon ang ako nasab nga inahan ang di na namo ikauban kay gikuha naman sa kahitas-an.

Wa na mi inahan ug wa na sab mi amahan. Ug kami nalang pito ka managsuon ang ania sa yuta nga dunay tagsatagsa ka pamilya.

Kay ang lubong hinuon karong Dominggo ug sa Biyernes maoy akong higayon sa pagpauli sa among dapit sa siyudad sa Danao.

Di man tuod maayo ang akong tuig 2017 kay di pa lang dugay gipaubos man ako sa major operation tungod sa ruptured appendicitis ug wa pa gani maayo ang samad, pasalamat sa gihapon sa kahitas-an taliwa sa mga pagsuway wa kita niya biya-i ug gihatagan og kaisog aron batokan ang mga pagsuway.

Ma, nasayud ako kon asa man ka karon gibutang sa Diyos, makasiguro ko nga naguban kamo sa imong pinanggang bana nga si Tatay.