Don’t give up on us
Wa na lang ko mangutana kang Mama kon asa mi mopaingon. Basig masuko siya nako. Apan ning higayona, samtang nagsakay mig taksi ug nagtupad paglingkod sa luyong bahin, namatikdan nako nga namuwa ang nawong ni Mama. Morag kahilakon siya apan nagpugong lang gyud tingali siya sa iyang kaugalingon.
Naunsa ba ni si Mama ron, uy? Hilom kong nakaingon. Sukad lang nga miadto sa among balay kadtong lalaki nga naghilak, nausab na gyud si Mama. Kanunay na siyang naghinuktok. Nagmahilumon na siya ug kanunay init og ulo.
Ug karon, guol ang nawong ni Mama. Sa usa ka funeral parlor gipahunong ni Mama ang gisakyan namong taksi. Human siya makaplite sa drayber, wa siyay tingog nga nanaog. Misunod ko niya. Misamot ang gibati kong kahibulong. Mag-unsa man mi ning lugara, uy? Hilom na sab kong nakapangutana sa akong kaugalingon.
Unya, mipaingon si Mama sa usa ka lungon, sa usa ka tawo nga gihaya. Nakatan-aw ko sa usa ka lalaki nga naglingkod sa naglaray nga mga lingkoranan sa atubangan sa maong lungon. Nagsul-ob siyag tisirt nga itom. Mitindog siya ug mitan-aw kang Mama nga nag-apong na sa bentana nga bildo sa lungon. Nagtan-aw si Mama sa nawong sa namatay.
Nakaila ko sa nawong sa maong lalaki. Siya kadtong lalaki nga miadto sa among balay nga naghilak? Na, misamot na gyud ang gibati kong kahibulong. Unsa ba gyud ning hitaboa, uy? Naglibog na gyud ko.
Miduol ko kang Mama. Gitan-aw ko sab ang nawong sa namatay. Mora lang kinig natulog. Guwapo siya ug puparehas og edad ni Mama. Milingi ko kang Mama kay naghingus-hingos siya. Namahid siya sa gikuptan niyang panyo sa iyang mga mata. Naghilak na gyud si Mama.
“Gipasaylo na tika. Magmalinawon unta ang imong kalag.”
Bisag hinay ang pagkasulti ni Mama, apan nadungog kaayo kini nako. Unsa man diay sala aning namatay kang Mama nga nakaingon man si Mama nga iya na kining gipasaylo? Na, pagkalibog gyud aning sitwasyona.
Mibiya si Mama sa lungon. Wa koy tingog nga mikuyog niya. Mihunong paglakaw si Mama sa atubangan sa usa ka babaye nga naglingkod ug nagbestidag itom. “Condolence.”
Mitindog ang babaye ug gidawat ang kamot ni Mama nga iyang gitunol ani.