ROMEO WA GIHAPON
Padayon ang Gilas Pilipinas sa ilang preparasyon alang sa umaabot nga FIBA World Cup qualifiers kagahapon sa Meralco gym sa Manila apan wala gihapon nakatunga ang maidlas nga pointguard nga si Terrence Romeo.
Gipangulohan nila ni Jayson Castro, June Mar Fajardo, Calvin Abueva, Gabe Norwood, Troy Rosario, Matthew Wright, Raymond Almazan, ug Allein Maliksi ang ningtunga nga mga magduduwa sa closed-door training.
Naa sab ang mga batan-ong sila si Mac Belo, Carl Cruz, Roger Pogoy, Kevin Alas, ug Kiefer Ravena.
Gawas kang Romeo, wala sab nakatunga kagahapon si Japeth Aguilar.
Nasayran nga kasamtangang naa sa Saudi Arabia si Romeo alang sa usa ka promotional tour sa iyang gi-endorso nga sapatos nga mao ang Peak.
Wala pa’y nasayran kon kanus-an makabalik ang pambato sa Global Port Batang Pier.
Sa laing bahin, hingpit na nga nakadesisyon ang Gilas nga ang naandan na niining si ex-NBA Andray Blatche ang ilang kuhaon nga naturalized
player aron makatabang kanila ning malisod nilang tahas.
Sa sayo pa, adunay mga gipangkonsiderar ang Gilas nga ihulip kang Blatche sa usa lang ka luna alang sa natuaralized player basi sa patakaran sa FIBA.
Gawas kang Blatche, gipangkonsiderar sab sa Gilas si Fil-German Christian Standhardinger, kinsa mihulip sa puwesto ni Blatche sa Fiba Asia Cup sa Lebanon, ug Isaiah Austin, kinsa miduwa sa Chooks to Go Pilipinas sa Fiba Asia Champions Cup sa Chenzhou, China.
Si Standhardinger maoy napiling No.1 rookie oveall pick sa San Miguel Beermen sa miaging Philippine Basketball Association (PBA) Rookie Draft.
Apan dili pa makaduwa si Standhardinger sa PBA hangtod dili mahuman ang iyang kontrata sa Hong Kong Eastern sa Asean Basketball League (ABL) nga molanat pa og unom ka mga buwan.
Samtang si ang 7’1” nga si Austin mibalik na sa Amerika.
“Nothing specific yet,” asoy ni Gilas team manager Butch Antonio kabahin kang Austin.
Ang Samahang Basketbol ng Pilipinas (SBP) wala pa nakasugod og lakang kabahin sa paghimo kang Austin nga
naturalized player hinungdan nga kuli kini nilang makuha ning tuiga.
“We have not begun the tedious and difficult process of naturalizing anyone new. Our current naturalized player is (still) Andre Blatche,” pasabot ni SBP vice-chairman Robbie Puno.