Gullas Cup caging, Nob. 18
Sugdan sa Talisay City Aquastars ang ilang kampanya sa pagdepensa sa titulo karong Nobiyembre 18 sa pagsugod sa 2017 1st District Congressman Samsam Gullas Cup Inter-cities/Municipalities 20-under basketball tournament sa Minglanilla Sports Complex.
Tulo ka mga siyudad ug tulo ka mga lungsod ang nangandam na sa ilang kampanya ning maong torneyo nga gitumong aron pagdiskubre og preskong mga talento sa natad sa basketball sa maong distrito.
Atol sa meeting sa niaging semana nga gipahigayon sa Usting Restaurant sa siyudad sa Naga, nasabutan nga sama sa gihapon, bahinon ngadto sa duha ka brackets ang unom ka mga partisipante.
Molangkob sa Bracket A ang tulo ka siyudad nga mao ang Talisay City, Naga City ug Carcar City samtang ang Minglanilla, San Fernando ug Sibonga mao usab ang magtipo sa Bracket B.
Hinuon ang format mosunod sa double elimination round diin ang tanang teams magkasangka. Ang top two sa matag bracket human sa elimination phase maoy mag-abot sa cross-over semifinals round diin ang mga mananaog maoy magsangka sa best-of-three finals samtang ang mapildi mag-ilog alang sa third place honor.
Gikauyonan usab nga imbis tulo, duha na lang ka duwa ipahigayon matag playing date apan dugangan ug mga ad- law ang mga schedules sa mga duwa. Sa gihapon sundon ang home-and-away games diin ang tanang lungsod ug siyudad patas nga maka- host sa mga duwa. Ang torneyo motapos sa ikaduhang semana sa Disyembre.