IRVING PADAYON NGA NAGBANGIS
Padayon ang kainit ni Kyrie Irving ug iya na sab naagak ang Boston Celtics sa laing kadaugan batok sa host Atlanta Hawks, 110-107, kagahapon sa National Basketball Association (NBA).
Bisan asa nga puwesto, nangigo ang four-time All-Star sa iyang pagmugna og 35 puntos aron pangulohan ang kadaugan.
Ang nakaanindot niini, gihilambigit ni Irving ang iyang mga kauban sa iyang duwa hinungdan nga nakakuha siya og saktong suporta.
Nidugang og 21 puntos si Jayson Tatum alang sa Celtics samtang nitampo og 15 puntos ug 10 rebounds si Al Horford.
“It’s a beautiful game when it’s played the right way,” matod ni Irving. “It’s not going to look good every possession, but you’ve got to be able to move onto the next play. I understand that better than most.”
Kini maoy ikasiyam nga sunodsunod nga kadaugan sa Celtics human sila nasubhan og duha ka mga pilde. Kini maoy labing taas nga sunodsunod nga kadaugan nga naposte sa Celtics sa milabayng pito ka mga tuig.
Ang three-pointer ni Irving maoy nakahatag sa Celtics og 104-103 nga labaw – ika-25 nga binayloay sa labaw – sa nahabiling 1:37 minutos.
Grabe man tuod kasikit ug kulbahinam ang duwa human niini apan wala motugot ang Celtics nga makuha pagbalik sa Hawks ang labaw hangtod na sa katapusang gutlo.
Ang Hawks, nga nahagsa sa 2-9 nga baraha, gipangulohan ni Dennis Schroder pinaagi sa iyang 23 puntos.
Ang Hawks taas og moral nga ninghamag ning kombatiha gumikan kay gikan sila sa makapakaging nga kadaugan batok sa Cleveland Cavaliers. “It would’ve been sweet to win two in a row against those kinds of teams,” asoy ni Schroder. “But we ended up short.”
WARRIORS 97, HEAT 80
Bisan wala mogana og insakto ang tira sa gawas sa defending champions ug host Golden State Warriors sulod sa ilang balwarte, nakamaneho gihapon kini pagbugnaw sa Miami Heat.
Gipangulohan ni Kevin Durant ang kadaugan pinaagi sa iyang 21 puntos, nidugang og 18 puntos si Draymond Green, nitampo og 16 puntos si Steohen Curry samtang nihatag og 13 puntos si Klay Thompson.
NETS 98, SUNS 92
Nagpakatap og 23 puntos ug walo ka assists si D’Angelo Russell samtang niamot og 18 puntos si Joe Harris aron pangulohan ang kadaugan sa Brooklyn Nets batok sa host Phoenix Suns.
Ningbangon ang Suns gikan sa 15 puntos nga pagkalubong ug ilang nailog ang labaw, 7574, sa nahabiling 9:17 minutos.
Apan wala magdugay, nakuha ra dayon pagbalik sa Nets ang labaw ug nagpakalig-on sila hangtod na sa pagpupos sa oras.