TRIBUNALO GIREKLAMONG NANGUMOT OG SAMPOT

Pangulo sa Provincial Disaster Risk Reduction and Management Office (PDRRMO), Baltazar Tribunalo, gireklamo sa usa ka babayeng empleyado sa Kapitolyo nga nanghikap sa iyang sampot.

Ang reklamo gipadangat sa Provincial Women’s Commission (PWC).

Si Tribunalo ug ang babaye nag-atubang na mismo sa opisina ni Bise Gob. Agnes Magpale kagahapon sa buntag.

Niadtong Lunes, pormal nga nakadawat og reklamo ang PWC gikan sa usa ka babayeng empleyado sa Kapitolyo, nga nialegar sa pagpanghikap ni Tribunalo sa iyang sampot atol sa usa ka assessment meeting niadtong buwan sa Hunyo.

Sigun ni Magpale nga atol sa maong tigom, nagsuot og hipster nga karsones ang babaye hinungdan sa pagkaklaro sa bugol sa iyang sampot.

“Imo man gyud gikuot,” padayag ni Magpale, base sa pamahayag sa babaye.

“Naglingkod siya unya kana bitaw’ng jeans nga hipster inig lingkod mo-abli man. Niingon si Baltz (Tribunalo) gibadlong ta tingali ka nga hot sexy ra kaayo pero wa intawon ko nag-kuan (naghimo), as reported,” dugang ni Magpale subay sa pamahayag ni Tribunalo.

Kagahapon sa buntag, gipatawag ang duha ni Bise Gob. Magpale alang sa inisyal nga husay sa reklamo.

Gipugngan ang pangalan ug departamento diin nahisakop ang empleyado tungod sa kasensitibo sa isyu ug samtang wala pa siya hingpit nga makahatag sa iyang habig.

Dugang ni Magpale, diha mismo atubangan niya gihimakak ni Tribunalo ang pasangil sa reklamante.

“Ako no, I’m a very loyal husband, a very good family man and I cannot do that,” asoy ni Magpale, base sa iyang nadungog gikan kang Tribunalo atol sa pasiunang husay sa iyang buhatyan.