KAPITAN MIPAKITA OG SEX ORGAN?
BABAYE MIALEGAR NGA GIDANI OG SEX
Usa ka 35 anyos nga labandera sa Barangay Maghanoy, lungsod sa Barili, Cebu ang nireklamo batok sa ilang barangay kapitan human gipakita siya sa kinatawo niini ug gihagad nga makighilawas.
Si Lynda (dili tinuod nga pangalan) kinsa adunay lima ka mga anak, nitug-an sa RMN dyHP ug Superbalita Cebu nga niadtong Sabado, pasado alas 9:00 sa buntag, samtang nanglaba siya sa mga sapot sa iyang agawon, nanitsit ang ilang kapitan ug giingnan nga “I love you.” Ang kapitan giila nga si Billy Catamora, 54, minyo ug silingan ni Lynda. Human masulti sa gipasanginlang kapitan ang maong mga pulong, giingong nipakita dayon kini sa iyang kinatawo hinungdan sa kakurat ni Lynda.
Dugang asoy ni Lynda, giagni siya nga magkita sa alas 7:00 sa gabii niadtong Sabado sa usa ka payag nga duol sa balay sa kapitan ug didto sila maghilawas bugti sa bayad nga P2,000.
“Permiro ana, nagsige na siya’g sinyas nga ‘I love you’ nya ako giingnan nga unsa man? Ana siya nga ‘I love you’, ako pud gitubag nga ‘Aw, kana ra diay?’ Human ato nagpakita na siya sa iyang koan kinatawo nya iya ko gihagad nga maghilawas,” matod ni Lynda.
Ang gihimo ni Kapitan Catamora giingong nakita usab sa iyang anak babaye nga naa sa dapit diin siya nanglaba niadtong tungora.
Tungod sa gihimo sa kapitan kaniya, wala na siya mahimutang nga sa iyang hunahuna na bastos ang iyang pagkababaye.
Iyang gitug-an sa iyang bana ang gihimo sa kapitan ug tungod sa kapungot, gipaniya kini sa Barili police station.
Dinhi nasuta nga dili lang si Lynda ang gibiktima sa kapitan lakip na ang laing duha ka babaye nga ila ra usab nga silingan apan wala lang moreklamo.
Gihimakak ni Catamora ang pasangil ni Lynda kay matod niya siya ang gibuso ug dili siya ang nanghagad.
Matod sa barangay kapitan, matag buntag diha sa punoan sa kamunggay nga nahimutang sa tugkaran sa ilang panimay siya mangihi ug ning maong reklamo siya nagtuo nga na frame up siya ni Lynda.
“Dili na siya tinuod, sir, oy, na-frame (up) ra ko niana. Pagpangihi nako sa kilid sa koral wala pa may tawo sir sa paglingi nako naigking ko kay naa na may tawo. Nagtan-aw man siya, sir. Niingon ko, nganong nitan-aw man ka? Nya mipahiyom siya ug milingkod ug mitan-aw,” matod ni Catamora.
Bisan pa man sa panghimakak ni Catamora ug mibali pa og pasangil kaniya nga siya maoy namuso, nakahukom na si Lynda nga mopasaka og kaso ngadto sa Visayas Ombudsman sa gipakitang batasan niini ngadto kaniya nga matod niya usa ka dili maayong binuhatan sa usa ka public official. /