JG Summit interesado mobubo og P18 B proyekto sa SRP
Nipadayag sa ilang kaandam pagbubo og binilyon nga puhonan ang JG Summit Holdings, Inc. aron makasulod sa South Road Properties (SRP) nga gipanag-iya sa Cebu City Government.
Si Mayor Tomas Osmeña nagkanayon nga niduso sa ilang proposal ang kompaniya nga gipanag-iya ni John Gokongwei, Sr., aron mobubo sa ilang P18 bilyones nga proyekto sa SRP.
Gihulagway ni Osmeña nga lahi sa ubang developer ang tanyag sa JG Summit nga maoy
mother company sa Universal Robina, Robinson malls, Robinsol Land, Cebu Pacific sanglit igo lang silang moabang sa 8 ka ektaryang luna sa Kawit island nga maoy gibarogan sa Sugbo building.
Matod pa sa mayor nga ang maong unsolicited proposal nakabintaha ang City Government sanglit human sa 50 katuig nga maoy iyang gustong ihatag ngadto sa land
developer, ang mga nagbarog nga edepisyo mapanag-iya sa dakbayan.
Gitug-an niya nga motukod og upat ka hotel towers ang JG Summit nga langkuban sa 1,000 ka rooms, convention center, casino, restaurant ug daghan pang uban.
Gipahibawo sa mayor nga ang abang sa luna magepende sa gross salesang kon sa kinatibuk- kita sa maong La Isla de la Victoria (maoy gustong ipangan sa mayor) diin 10 ngadto sa 15 porsyento ang maadto sa panudlanan sa City Hall.
Ang La Isla de la Victoria gipahinungod sa mayor ngado sa iyang kanhi sinaligan sa Bantay Dagat nga si Jojo de la Victoria kinsa gipusil patay gumikan sa iyang aktibo nga kampanya sa illegal fishing ug market denial. Kon madayon ang maong
unsolicited proposal nga nagkinahanglan sa pagtugot sa konseho, I- demolish ang Sugbo buidling samtang ang edepisyo sa senior citizen ibalhin sa developer sa Senior Citizen park duol sa City Hall diin walay gasto ang siyudad.
Bugtong magpabilin sa Kawit island mao ang nagbuntaog nga istatuwa ni Snr. Sto. Niño diin mag-atubang sa dagat ang mga maanindot nga estruktura ug gihualgway sa mayor nga usa unya kini sa hinungdan sa pagmahal og maayo sa yuta sa SRP ug makamugna kini og daghang trabaho.