4 KA TUIG HUMAN NI YOLANDA, KUMUSTA?

Upat ka tuig human miigo ang bagyong 'Yolanda' sa nasod, padayon gihapon nga giayo karon ang mga tunghaan sa amihanang bahin sa Sugbo.

Mokabat 50 ka mga tunghaan sa sumatotal 114 ka pampubliko nga tunghaan ang nakadawat og pundo gikan sa Deparment of Education, isip lakip sa labing uwahi nga batch sa Bagyong Yolanda nga budget.

Gikatakda usab nga 805 ka bag-ong classroom ang pagatukoron sa mga apektado nga dapit sa amihanang Sugbo.

Matod ni Engr. Noemi Guillen ang physical facilities coordinator sa DepEd 7 nga aduna’y gigahin ang ilang ahensiya nga P122.6 milyones alang sa pag-ayo sa mga naguba nga public school sa Northern Cebu.

Ang P122.6 milyones nga pundo gikan sa Basic Educational Facilities Fund (BEFF) sa DepEd sa nakalabay nga tuig.

Sa isla sa Bantayan, nakadawat ang lungsod sa Bantayan og P14.3 milyones alang sa 12 ka tunghaan samtang ang Madridejos ug Santa Fe nakadawat og P7.2 milyones alang sa lima ka tunghaan.

Samtang sa Tuburan, P14.3 milyones alang sa 17 ka tunghaan; Daanbantayan ug Medellin, P24.2 milyones.

Nakadawat usab ang San Remigio og P16.3 milyones alang sa 12 ka tunghaan; Tabuelan ug Sogod, P10.3 milyones alang sa 15 ka tunghaan.

Borbon ug Tabogon, P10.6 milyones alang sa 13 ka tunghaan; Catmon ug mga lungsod sa isla sa Camotes lakip ang San Francisco, Tudela ug Pop nakadawat og P11.5 milyones alang sa 13 ka tunghaan.

Samtang P11.2 milyones alang sa walo ka tunghaan sa Bogo City.

Lakip sa nahuman na kining mga tunghaan sa Bantayan, Madridejos, Santa Fe, San Remigio, Tabuelan, Sogod, Borbon ug Tabogon.

HOUSING

Bisan sa wala gihapon pagpadangat sa gisaad nga mga housing unit gikan sa National Housing Authority alang sa mga biktima sa bagyong Yolanda sa amihanang Sugbo, nakita sa Kapitolyo nga nakabangon na sa hingpit ang mga apektadong residente gikan sa pait nga kasinatian sa katalagman human sa upt ka tuig nga naklabay.

Gani, si Bise Gob. Agnes Magpale nagtuo man nga mas maayo ang dagan sa rehabilitasyon dinhi kon itandi sa mga dapit sa Leyte.

Giangkon sa Provincial Disaster Risk Reduction and Management Office (PDRRMO) nga nagpabiling hagit karon ang wala matuman nga saad sa NHA pagpadangat sa mga gikinahanglang housing unit sa mga residenteng naapektohan sa bagyo.

Sa talaan sa Office of the Presidential Assistant for the Visayas, moabot sa 22,423 ang mga gikinahanglan nga housing unit sa tibuok Central Visayas human ang bagyong Yolanda apan anaa lang sa 1,648 ang nakumpleto sa pagtukod, 1,127 ang anaa sa mainland Cebu.

Hinuon anaa na sa 19,604 ang na-bid out na.

Taliwala niini, nagtuo si PDRRMO Head Baltazar Tribunalo nga naka- recover na ang mga biktima sa katalagman.

Samtang wala pa’y nakompleto nga resettlement project ang gobiyerno, daghan na hinuon nga mga pribadong grupo ang nakapatukod ug mga pinuy-anan alang sa pinili nga Yolanda victims.

Bisan pa niini, si Bise Gob. Magpale nagtuo nga positibo gihapon ang gihimo nga rehabilitasyon sa Yolanda- stricken areas dinhi sa Sugbo. Gani nagtuo siya nga mas maayo kini kon itandi sa sitwasyon sa Eastern Visayas.

Human ang 4 ka tuig, lakip sa mga problema nga nakita mao ang pagpamagahi gihapon sa mga residente nga padayong nagpuyo diha sa mga danger zone, ilabi na sa coastal area.