Si Taytayan gyud kana?

Ambot og unsaon ni pag-alkontra sa Mandaue City Police Office (MCPO) kining pamahayag sa kapitan sa barko ug pipila ka mga tripolante nga ang ilang kauban nga si Felix Taytayan diha ra sa barko sa dihang nahitabo ang pagpusil patay ni PO1 Mae Sasing niadtong gabii sa Kalag Kalag.

Kini si Taytayan, apprentice sa MV/Gemini 6 nga nagbiyahian sa isla sa Bantayan ug Cebu, maoy daling gi- pick up sa kapulisan sa Mandaue ug gihimo dayong suspek sa maong krimen.

Ang relasyon ni Sasing ug ni Taytayan nga naputol na sud sa siyam ka tuig, ang gihimong anggulo ni MCPO chief Sr. Supt. Roberto Alanas sa maong krimen.

Iyang gipalutaw nga gusto ni Taytayan nga balikon ang ilang relasyon apan hugot kining gibalibaran sa babayeng pulis kay lagi duna na kini siyay kapuyo.

Ug, matod pa, dinhi nagsugod ang kainit sa sitwasyon tali sa duha nga maoy hinungdan sa pagpusil patay ni Sasing niadtong gabii sa Kalag Kalag.

Migintang lang og pipila ka adlaw gikan sa pagpatay ni Sasing nadakpan dayon kunohay ang suspek -- butang nga nakapabilib ni Mandaue City Mayor Luigi Quisumbing kinsa posibling mohatag og pinansiyal nga pahalipay ngadto sa MCPO.

Pero mora man og mabolabog si Alanas niining iyang pagdalidali og tumbok ni Taytayan nga suspek ug pagdeklarar nga sulbad na ang maong krimen.

Makapaduda ning iyang gihimo kay gawas nga gi- mislead niya ang mayor ug ang publiko, mahimong kataw-an lang siya sa tinud-anay nga mamumuno kon tinuod man gani ning mga pamahayag sa kapitan sa barko ug sa mga tripolante.

Dili baya lalim nga mabilango ta nga way sala. Mao nay giingon nga mas maayo pay makapagawas kag usa ka gatos nga makasasala kay sa makapabilanggo ka og usa ka inosenti.