Don’t give up on us

Naghilom lang si Mama samtang nagtupad mig lingkod sa luyong bahin sa taksi nga among gisakyan sa amo nang pagpauli. Naglibog gyud ko sa akong nasaksihan didto sa funeral parlor.

“Kining, Ma, kinsa man tong patay nga atong giduaw?” Nag-inisog na gyud ko, uy, aron mawala na ang akong kalibog.

Gitan-aw kog dugay ni Mama. Apan ning higayona, way kasuko nga nakita ko sa iyang nawong. Miginhawag lawom si Mama.

“Si Donato. Siya ang akong first love. Para nako, forever ang love ko niya. Pero nagminyo siyag laing babaye. Gikasilagan ko siya.”

Nagpamahid si Mama sa iyang mga mata. Naghilak na sab siya. Naghilom lang ko. Gusto kong paminawon ang dugang pa niyang itug-an nako.

“Kadtong babaye nga akong gi- condolence maoy asawa ni Donato.”

“Nakita ko sab lagi didto kadtong laki nga miadto sa atong ba’ay nga naghilak sa iya nang pagpauli, Ma.”

“Si Jonas to, Amelia. Bugtong anak ni Donato sa babaye nga iyang gipakaslan. Miadto siya sa atong ba’ay kay gustong makigsulti si Donato nako, kay gusto kining mangayog pasaylo nako sa di pa siya mamatay. Kanser ang sakit ni Donato. Pero wa ko makahatag og pasaylo nya. Pero karon nga patay na siya, na-realize nako nga angay na siyang pasayluon aron magmalinawon ang iyang kalag.”

Sagunson nga nanghupaw si Mama. Wa na siya maghilak. Nakapanglingo siya.

“Puwerte gyud dakoa sa akong paghigugma niya, uy. Pero minyo na siya. Maong gisugot ko ang imong amahan ug nagminyo mi.”

Wa na ko magtingog. Kontento na ko sa gisugid ni Mama nako. Nahunahuna nako nga karon nga patay na si Noy Donato, magmalinawon na si Mama. Dako ang akong pagtuo nga bisag naminyo na si Mama kang Papa apan nagpabilin ang iyang gugma kang Noy Donato.

“Komusta na kaha ron Papa, no, Ma?”

Gituyo ko ang pagpalain sa among gihisgotan. Seaman si Papa. Every nine months siya mokanaog sa barko nga iyang gisakyan nga sa laing mga nasod mobiyahe.

“Nagkaestoryahay mi kagabii. Mokanaog siya next week.”

“Tuod diay, no? Sus, nine months na man diay siya sa dagat.”

Pagka ugma, gikan sa eskuwelahan, wa ko modiretso sa pagpauli. Mihapit ko sa funeral parlor nga gihayaan ni Noy Donato.

(SUMPAYAN)