GAB CONSULTANT GIKIHA SA PBOC
Gipasakaan og kasong qualified human tracfficking ni Professional Boxing Officials of Cebu (PBOC) president Edward Ligas kagahapon sa Office of the Visayas Ombudsman si Games and Amusement Board (GAB) consultant Juan Ramon Guanzon.
Kini kabahin sa usa ka kuwestiyunableng babayeng boksidor nga si Janiper Ortiz, kinsa giisyuhan ni Guanzon og boxing license ug gipalarga sa Australia alang sa usa ka away..
Pinaagi ni Guanzon, kinsa kanhi GAB chairman, si Ortiz nakakuha og Australian visa aron moaway sa usa ka boxing event niadtong Oktubre 11, 2013 sa Malvern, Victoria, Australia.
Sa gipasakang reklamo ni Ligas, giingon nga igo ra’ng gigamit sa Australian fiancee ni Ortiz si Guanzon aron makalarga ang iyang hinigugma sa Australia. Ang fiance ni Ortiz nga si Peter Maniates, usa ka small time boxing promoter sa Australia. Gipasanginlan ni Ligas si Guanzon nga migamit sa gahom niini sa gobiyerno aron makapagawas og “peke” nga mga dokumento aron ipamatuod sa Australian government nga usa ka boksidor si Ortiz.
Apan giklaro ni Ligas nga dili usa ka boksidor si Ortiz ug wala kini makaaway ibabaw sa boxing ring sukad masukad ug wala kini rekord sa boksing.
Nagkanayon si Ligas nga human sa upat ka mga tuig, nagkabuwag ra si Ortiz ug Maniates. Matod pa nga nabiktima si Ortiz sa pangpangabuso hinungdan nga mibiya kini kang Maniates.
“I have nothing against GAB except Guanzon. Ang ako ani, at least madesiplina siya,” matod ni Ligas sa usa ka press conference kagahapon sa Abuhan Restaurant sa dalan Ramos, dakbayan sa Sugbo.
Gitataw ni Ligas nga suportado siya sa tanang mga sakop sa PBOC ning maong iyang lakang.
Asoy ni Ligas nga tinguha sa ilang grupo nga matangtang si Guanzon isip GAB consultant ug dili na kini makalingkod bisan unsa nga posisyon sa gobiyerno.
Lakip sa reklamo ni Ligas mao ang pagtugot ni Guanzon sa mismatch nga mga away sa sulod ug gawas sa nasod.
“He should resign. He is a disgrace in the boxing community. Kon naa gihapon siya sa posisyon, naa pay chance nga maka- commit na sab siya og aning bati niya nga binuhatan,” dugang ni Ligas.
“Worse is he cheated not only the Philippine government but also the Australian government.”
Si Ligas nagpagawas og mga hulagway ni Ortiz ngadto sa media aron ipakita nga wala sa pamay-ong niini ang usa ka boksidor. Asoy ni Ligas nga sa kasamtangan, nagtrabaho si Ortiz isip model sa Australia.
“Tan-awa lang na kon boxer ba na. Kamo unsa’y tan-aw ninyo,” pangutana ni Ligas.
Sa laing bahin, matod ni Ligas nga mangayo sab siya og suporta sa mga senador nga sila si Alan Peter Cayetano ug Risa Hontiveros aron mapaspas ang dagan sa iyang kasong gipasaka.
Si Cayetano maoy Department of Foreign Affairs (DFA) secretary samtang si Hontiveros usa ka women’s right advocate.
Kon mapamatud-an nga sad-an, mahimong mabilanggo si Guanzon sulod sa 20 ka mga tuig, asoy ni Ligas, kinsa usa ka international boxing judge.