Mga liso nga gitisok ko
Tigulang na silang Leo ug Oping. Hapit na sila mag-setinta anyos. Apan ang ilang tawganay sa usag-usa wa gyud mausab. “Ling” gihapon nga nagpasabot og ‘darling.’
Sa gidugayon sa ilang panagluon sa ilang kaminyuon, di na maihap ang mga higayon sa ilang panagbangi ug panaglalis nga usahay mosangpot sa ilang panag-away. Maasgad nga luha manggusod sa mga mata ni Oping tungod sa kabilyako sa iyang bana. Wa silay laing awayan kundili bahin sa babaye gyud. Unsaon man lagi nga tsikboy man ang iyang gipili!
Wa say babaye nga di makaher kang Leo sa iyang kabatan-on kaniadtong mga panahuna. Una, ambungan siya, himsog og lawas ug sakto sa pamarog. Ikaduha, may kuwarta siya. Gisulayan bitaw ni Leo nga dili siya manguyab sa iyang maibgan. Iya rang pahiyuman ug kidhatan. Apan moduol gayud kaniya ang mga babaye. Mobaiid kaniya ug maghapyudhapyod.
Ug way kalibutan si Oping nga may tulo ka anak ang iyang bana sa lainlaing mga babaye. Pulos na usab mga dalaga ug nagtrabaho sa U.S.A. Magpadalhan og dolyar ang tulo kang Leo.
Sa hilom si Leo maoy nagpa-eskuyla sa mga bata kaniadto sa gagmay pa kini hangtod nag-college. Bisan og nagtrabaho si Leo sa dakong kompaniya ang duha niya ka igsuon nga doktor ug enhinyero nga tua sab sa U.S.A. magpadalhan usab kaniya og dolyar. Si Oping tunolan ni Leo sa iyang suweldo nga sakto ug way iban.
Duha ray ilang anak ni Leo ug ni Oping. Sila si Mateo ug si Lucas. Mga ngalan diha nila kuhaa sa Bibliya. Pulos mitungha ug nakatapos pagka sundalo sa PMA ug na-assign sa Army. Apan way suwerteng mga bataa, kay wa pay usa ka tuig giasayn sila sa Negros tungod sa pagsiaw sa mga rebelde. Ang six-by-six truck nga ilang gisakyan kuyog sa lain pang mga kauban girakrakan sa mga rebelde samtang nagtungas sila sa bungtod ug ang tanan gyud nahurot pagpangamatay.
KARON nia sila si Leo ug Oping sa ilang tugkaran nanglingkod ug nagpahayahay sa lab-as nga hangin. Panahon na nga sayran ni Leo ang iyang asawa sa kagahapon nga iya lang gitago sa suok sa katuigan.
“Ling” sangpit ni Leo sa asawa, “Kita ba mga tiguwang na. Wa na tay anak natong duha.”
“Bitaw, Ling,” ni Oping, “Mora tag ulitawo ug dalaga.”
“Sakto ka, Ling,” ni Leo, “Apan, Ling, di ka ba masuko sa isugilon ko kanimo? Importante kini nga masayod ka karon!”
“Unsa man kana, Ling?” ni Oping, “Kon bahin man gani nag babaye di na angay nga manuyo ko nimo sama sa batan-on pa kita!”
“Salamat, Ling, nga imo kong hisabtan.” Ug gisuginlan ni Leo si Oping sa tulo niya ka anak babaye nga tua sa Amerika.
”Ugma sa buntag, Ling, mangabot silang tulo atol sa akong birthday. Nagsabot sila nga makig-bonding kanatong duha. Ug dako kining hikay nga mahitabo! Unsay imong ikasulti, Ling?” ni Leo nga mitan-aw sa nawong ni Oping.
“Aw, okey ra ko, Ling! Nawad-an tag duha ka anak apan gihulipan pod og tulo. Maayo hinuon!”
“Wa ko magmahay, Ling, sa mga liso nga gitisok ko kaniadto kay karon namungag tulo ka liwat nga manggihunahunaon!” (KATAPUSAN)