EX-CON, KAUBAN GIRAKRAKAN SAJAIL OFFICERS

ANGOL, NAOSPITAL HUMAN MAMUSIL UNTA SA JAIL SA MAGHAWAY

Ang Talisay City Jail sa Barangay Maghaway gisuwayan na usab unta pagrakrak, apan ang armas sa mga mangtira nikagar.

Di pa igo, gibaslan sila og pusil sa mga jail guard nga nakabantay na sa duha nga nag-angkasay sa motorsiklo hinungdan sa ilang pagkaangol, apan sa managlahing ospital na sila nadakpan.

Usa nila napriso na kaniadto sa maong bilanggoan, samtang kapulisan nagtuo nga adunay tawo nga nagpaluyo sa mga pagpangrakrak, sama sa nahitabo ala 1:58 kagahapon sa kaadlawon.

Mga suspek giilang sila si Arjann Ababon Bacus, 22, ug si Joseph Troy Briones, 19.

Si Supt. Gil Inopia, warden sa Talisay City Jail nibutyag nga human sila nabiktima sa pagpangrakrak sa makatulo ka mga higayon.

Gitambagan sila sa ilang rehiyonal nga buhatan nga ang magbantay diha na sa atubangan nga gate, di na sa ikatulo, apan butangan og sandbag ang atubangan agi og depensa.

Matod ni Inopia, nakabantay ang duha niya ka mga guwardiya sa duha ka mga tawo nga nag-angkasay sa motorsiklo gikan sa Barangay Linao ug miagi sa ilang gate apan pagabot sa unahan mi-U-turn.

Pag-abot sa gate, ang nag-angkas kalit nga nibunot sa iyang armas dayog pamusil, apan wala makabuto tungod kay matod pa miungot.

Ang mga jail oficer ningbawos sa pagpusil hinungdan sa pagkaigo sa duha ug naratol ang angkas, dali unta silang ningsibat apan nahulog siya ug ang armas samtang nahabilin ang cellphone ug tsineles.

Pag-abot sa unahan, nangatumba pa kini ug daling nakasibat biniyaan ang ilang motorsiklo.

Ang duha nakasakay og laing motorisklo.

Ang kapulisan nga nitubag sa alarma nakakita pa sa daghang dugo hinungdan nga sila nagtuo nga samdan ang mga suspek.

Sa follow-up operation sa Talisay police, ilang nasayran nga ang drayber sa motorsiklo nga si Briones, taga Lagtang, samdan sa abaga nga niabot sa Talisay District Hospital, apan gibalhin sa Vicente Sotto Memorial Medical Center.

Samtang ang angkas nga namusil nga naila nga si Arjann Ababon Bacus, samdan sa suwang ug nagpatambal sa Minglanilla District Hospital, apan nagpabalhin sa Miller Hospital ug sa dihang naapas sa mga pulis sa Talisay, gibalhin gihapon sa VSMMC.

Si Inopia nibutyag nga si Bacus napriso na kaniadto sa ilang pasildiad niadtong Abril 7, 2015 tungod sa kasong illegal nga paghupot og armas, ug nakagawas niadtong Enero 2017.

Matod ni SPO2 Yvonne Illustrisimo, ang duha nalambigit sa mga tulis sa ilang lugar ug giingong gun-for-hire.

Aduna na silay nakuhang kasayuran kon si kinsa ang nagsugo sa pagpamusil sa prisohan, apan dili lang una nila ibutyag kon si kinsa.

Gisuta pa kon sila ba gihapon ang responsabli sa pagpangrakrak sa makatulo ka mga higayon kaniadto sa bilanggoan. /