HUOT SA TRAPIK:
■ Mao kini ang lawom nang bahin sa N. Bacalso Avenue, dakbayan sa Sugbo nga nahimutangan sa gitrabahong underpass. Sa Lunes, sirhan ang bahin nga giagian sa mga PUJ alang sa laing phase hinungdan nga gipaabot ang grabeng trapik. Usa na lang ka lane ang magamit samtang karon ug ugma dunay dry run nga ipahigayon.
Gipangandaman sa Cebu City Government ang grabeng kahuot sa dagan sa mga sakyanan inig sirado sa N. Bacalso avenue (Mambaling area) karong Lunes alang sa laing phase sa underpass.
Kagahapon, gipatawag ni Konsehal Dave Tumulak, chairman sa public order and safety ang mga representante sa Department of Public Works and Highways (DPWH) 7 ug City Traffic Operation Management (Citom) para sa maong katuyoan.
Si Francisco “Isko” Ouano, operations head sa Citom, nagkanayon nga sugod alas 6 sa buntag sa Lunes, sirad-an ang tibuok lane gikan sa sityo Caimito paingon sa intersection sa F. Llamas.
Ipahiluna sa contractor ang ilang mga heavy equipment aron pagtrabaho sa phase 1 sa P683 milyones nga tunnel nga proyekto ni Kongresista Rodrigo Abellanosa.
Samtang ang Citom nigahin og usa ka lane sa N. Bacalso (phase 2) gikan sa Shopwise paingon sa Cebu South Bus Terminal (CSBT) para sa mga sakyanan gikan sa Pardo area.
Matod pa nila ni Tumulak ug Ouano nga ang mga sakyanan nga mopaingon sa south (vice-versa), adto moagi sa South Road Properties (bus, mini bus, truck de karga, private) samtang ang mga PUJ, private ug uban pa adto moagi sa M. Gochan, Ganciang ug lahos sa dalan F. Llamas paingon sa ilang destinasyon.
Ang mga sakyanan gikan sa Pardo ( light vehicles paingon sa CSBT) mosubay sa one lane sa N. Bacalso (Mambabling) samtang ang mga sakyanan nga mopaingon sa SRP mosubay sa dalan Cabreros, Rizal extension lahos sa Vestil road.
Ang mga PUJ nga gikan sa Naga, moliko sa wala paingon sa dalan Sabellano lagbas sa barangay Quiot lahos sa F. Llamas.
Ang Citom mopadala og labing minos 12 ka mga traffic enforcer nga maoy modumala sa traffic, way labot sa task force alpha personnel ug auxiliary force.
Si Tumulak nagkanayon nga adunay mga barangay tanod nga moapil sa pag-man sa traffic.
Gihangyo sa konsehal ang mga motorista sa pagpataas sa ilang pasyensya sanglit sugod sa Lunes, makasinati og di tiaw nga kahuot sa trapiko ang N. Bacalso, F. Llamas, Sabellano ug kasikbit nga mga karsada.
Ang phase 2 nahuman sa contractor sulod sa 3 ka buwan samtang ang phase 1 ila usab nga gitinguha nga mahuman sa di pa ang panahon nga gitagal. /