Osmeña ikiha gumikan sa FB post nga hashtag ‘bahog b_l_t’

Posibleng mag-atubang og kaso si Mayor Tomas Osmeña resulta sa iyang hashtag(#) post gamit ang iyang kaugalingong Facebook page nga nagsentro sa pribadong parte sa lawas sa babaye.

Ang mga konsehal sa Team Rama nga maoy gipasabot sa #TeamRamaBahogB_l_t desidido nga mosang-at og kaso batok sa mayor kinsa una rang nangayo og dispensa sa na post sa iyang social page ug nipatangtang sa mensahe.

Si Osmeña nagkanayon nga di siya maoy personal nga nagpost sa mensahe nga nagsentro aron unta masulbad ang kabaho sa basura sa Inayawan dumpsite apan matod pa wa niya masulbad gumikan sa giingong pagbabag sa Team Rama diha sa konseho.

Si Konsehal Joy Pesquera, bugtong babaye nga sakop sa Team Rama, nagkanayon ang gibuhat ni Osmeña dakong tamparos ug insulto sa kababayen-an.

“That’s a discrimination. Unsa man iyang tan-aw sa mga babaye, baho nalang gyud? It’s really below the belt literally and figuratively,” padayag ni Pesquera.

Ang hashtag nakuha gikan sa video sa usa ka babaye nga nag-viral sa internent nga naghisgot sa kabaho sa iyang kinatawo base sa sulti sa laing babaye nga gigamit sa iyang bana.

Si Konsehal Pastor Alcover Jr., niingon nga binastos ang gihimo sa mayor ug di unta kini angay mogawas gikan kaniya sanglit siya ang amahan sa siyudad sa Sugbo.

Ang mayor sa iyang bahin nagkanayon nga di siya ang nagpost sa mensahe.

Apan siya nibutyag nga iyang papanubagon ang adminastrador sa iyang Facebook apan wa niya gibutyag kon si kinsa.

Gipadayag ni Osmeña nga di na niya mamonitor ang tanang panghitabo gumikan sa kadaghan sa iyang bulohaton diin gawas sa daghang pirmahanan, meeting ug uban pa, aduna pay gatusan ka mensahe sa iyang cellphone nga iyang basahon personal.

Giangkon niya nga matag post sa iyang Facebook, ikonsulta kini kaniya apan daw wala mabantayi ang maong hashtag.