16 mil ka punoan sa marijuana gipang-ibot sa kapulisan

Kapin sa 16 mil ka punoan sa marijuana sa duha bukirang barangay sa syudad sa Danao ang malampuson naibot sa kapulisan sa probinsya inabagan sa mga sakop sa Philippine Drug Enforcement Agency 7, duha ka tawo nadakpan.

Sa miaging semana nakadawat og taho ang Danao City police station labot sa presensya sa mga tinanom nga mga marijuana nga hapit nang harbison sa barangay Sibakan ug Togonon.

Kining maong mga barangay nga nahimutang na sa bukirang dapit sa siyudad diin mga lagyo na kaayo ang mga panimalay sa nanimuyo niini.

Matod ni Sr. Supt. Eggar Alan Okubo, hepe sa kapulisan sa probinsya sa Sugbo, nga gilusad dayon nila ang pagpaniid sud sa pipila ka adlaw ug dinhi nasuta nga tinuod ang gipang hatag nga impormasyon gikan sa usa ka residente.

Unang milusad ug operation ang Danao PNP uban ang Provincial Public Safety Company ug PDEA 7 niadtong Nobiyembre 8 ug ilang naibot ang 9 mil ka punoan sa marijuana ug 3 mil ka mga sanga niini sa barangay Sibakan.

Kagahapon sa buntag lla na usab nga girumbo ang Barangay Togonon diin naka ibot sila og 8 mil ka punuoan sa mga marijuana nga gihulagway ni Okubo nga molapas na sa gitas-on sa tawo.

Nasikop hinuon sa kapulisan ang duha ka tawo nga gituohan nga maoy nananom sa maong mga marijuana nga giila nga silang Reynaldo Cal nga taga Sibakan ug Julito Batucan nga taga Togonon.

Matod ni Col. Edgar Okubo nga magpadayon ang ilang pag patrolya sa kabukiran sa probinsya sa sugbo ilabi na sa mga dapit nga naila nga dunay plantation sa marijuana.

"May community participation dito dahil sila ang nagbigay ng information sa ating kapulisan na may plantation nga sa marijuana sa nasabing lugar,” matod ni Okubo. Ang PDEA-7 nibanabana nga moabot ngadto sa P5.7 million ang balor sa maong mga punoan sa marijuana.

Tungod sa kadaghan sa naibot, nimando na lang ang PDEA ug ang hepe sa CPPO nga sunugon sa maong dapit.