CFR kasohan na sa PRO 7

Pasakaan na og kaso sa Police Regional Office (PRO) 7 ang mga administrator sa Cebu Flash Report (CFR) bahin sa bomb scare niadtong Hulyo ning tuiga.

Si PRO 7 Director Jose Espino nipasalig sa mga tigbalita nga niadto sa ilang buhatan kagahapon nga giandam na ang impormasyon alang sa pagpasaka og kaso batok sa mga nagdumala sa page sa CFR sa Facebook.

“Dapat ma- file na ‘yan,” sumala sa direktor sa kapulisan sa Central Visayas sa pakighinabi sa mga sakop sa media. Ang post sa CFR sa Facebook niadtong Hulyo nakamugna og kabalaka sa mga molupyo sa dakbayan sa Lapu-Lapu human kini niingon nga gi- detonate na ang bomba sa kapulisan.

Si Espino nimando ni P/ Supt. Julius Caesar Gornez, officer-in-charge sa Regional Investigation and Detection Management Division (RIDMD) sa pagduso sa kaso sa piskaliya.

Wa sila motug-an kon kanus-a masang-at ang kaso ug kon pila ang apil sa kasohan.

Si Chief Insp. Leo Dofiles, pangu sa Regional Anti-Cybercrime Office (RACO) 7, nibutyag nga nahuman na sila sa imbestigasyon usa ka semana human sila gitahasan ni kanhi PRO 7 Director Noli Taliño. Si Taliño tua na madestino sa Camp Crame. Ang resulta sa investigation report ila nang naduso sa PRO 7 kon diin nailhan na ang mga administrator sa CFR.