12 ka LGUs sa rehiyon 7 apil sa awardees sa ‘Seal of Good Local Governance’

Di mominos 12 ka local government units (LGUs) sa Central Visayas, lima ang gikan sa Sugbo, ang mga awardee sa Seal of Good Local Governance (SGLG) sa Department of Interior and Local Government (DILG) karong tuiga.

Sa lalawigan sa Sugbo, apil ang tulo ka mga lungsod sa Sogod, Tudela ug Samboan samtang, sa city category, ang siyudad sa Naga ang nalakip.

Ang kagamhanan sa probinsya sa Sugbo ang nakakuha usab og SGLG alang sa provincial category. Kini ang iyang ikatulo ka sunodsunod nga higayon nga pasidungog sukad sa 2015.

Ang mga probinsya sa Bohol ug Siquijor ang naapil usab. Samtang sa city category,

awardee ang siyudad sa Tagbilaran. Sa mga lungsod, upat ang gikan sa Bohol nga naglangkob sa Alicia, Bien Unido, Duero ug Tubigon.

Si Gobernador Hilario Davide III niila sa kamahinungdaon sa participatory governance sa pagkuha sa SGLG ug nipahinungod niini sa mga Sugbuanon.

“Dili kini nato makuha kon wala ang pagtinabangay sa gobyerno ug katawahan. Busa atong doblehon pa ang atong paningkamot alang sa kalambuan sa matag Sugboanon,” dugang sa gobernador.

Si Mayor Kristine Chiong, pinaagi sa City of Naga Administrator

Arthur Villamor, niila sa papel sa Community Based Management System sa naangkon nga award nga maoy ikatulong higayon.

Matod ni Villamor sukad sa administrasyon ni kanhi mayor Valdemar Chiong hangtod sa pamunuan ni Mayor Kristine, na- develop ang insaktong documentation sa ilang mga programa ug proyekto sa siyudad.

Si Sogod Mayor Lissa Marie ‘Moonyeen’ Durano namahayag nga gibuhat lang nila unsay angay nga buhaton sama sa maayo nga financial housekeeping, paghimo og mga plano sama sa disaster risk

reduction management, Comprehensive Land Use Plan, Solid Waste Management Plan ug ang padayon nga pagpatuman sa transparency ug maayong pagdumala.

Kini na ang ikatulong higayon nga nakadawat sila og pasidungog.

Si Samboan Vice Mayor Emerito Calderon Jr. niingon nakab-ot ang award gumikan sa paningkamot sa tanan sa angay nilang buhaton.

Kinatibuk-ang 448 ka LGUs sa tibuok nasod ang apil sa awardees: 28 ka mga lalawigan, 61 ka mga siyudad ug 359 ka mga lungsod.

Ang opisyal nga talaan gipagawas sa website sa DILG ug pirmado ni Manuel Gotis, director sa Bureau of Local Government Supervision.