Lalake milukso sa pangpang
SOGOD, SOUTHERN LEYTE - Usa ka lalake ang milukso sa kapin kun kulang 300 metros nga gihabugon nga pangpang dapit sa Agas-agas bridge sa Sogod, Southern Leyte. Gidala sa Sogod District Hospital ang lalake diin nakaistorya pa kini sa kapulisan ug nagpaila nga si Gaga Ranis, 28, taga Brgy. San Jose, Baybay City. Matod ni SPO2 Elmer Castillon, tungod sa gugma ang rason nga nakadesisyon ang lalake nga molayat sa pangpang. “Suma sa iya istorya, gibuwagan siya sa iya uyab,” matod ni Castillon. Nasangit sa mga punoan ang lalake ug giluwas kini sa Search and Rescue Team ug kapulisan. Anaa pa karon sa tambalanan ang biktima.