Pag-ban sa Angkas

Daghang nasurprisa ug naguol sa niaging adlaw sa dihang gipahibawo sa Land Transportation Franchising and Regulatory Board (LTFRB) didto sa kaulohan nga ipasirado ug pahunongon na og operate ang Angkas, ang na- popular nga motorsiklong de pasahero kansang sistema sa pag- pick up og pasahero way kalahian sa Grab ug Uber nga mogamit og apps sa pag-book niini.

Si Aileen Lizada, ang vocal nga sakop sa LTFRB board, maoy mipahibawo sa mga reporters niini human sila makasakop og 19 ka mga Angkas operators nga way mga permits.

Iya usab gipakita sa mga reporters ang mga dokumento gikan sa Makati Business Permits Office nga nagpahibawo sa kompaniya nga dakpon ang mga Angkas drivers/operators kay wala kini mayor’s permit nga nagtugot kanila nga maka operate.

Gihatagan nila ang Angkas og tulo ka adlaw sa pagpasabot kon nganong angayan silang magpadayon og operate.

Makalibog ning gihimo sa LTFRB kay kinsa mang mayora nga mohatag og mayor’s permit ani nila nga ubos sa balaod wala man tugoti ang single nga motorsiklo nga makapamasahero.

Sama usab sa Grab ug Uber nga sa sinugdanan gidid-an usab sa pagpamasahero tungod kay wa lagi kini prankisa.

Apan tungod sa demand sa riding public gihatagan kini og igong konsiderasyon.

Kon nahimo kini sa LTFRB ngadto sa Uber ug Grab, way rason kon nganong di kini mahimo ngadto sa Angkas nga mao na karon ang dangpanan sa mga pasahero nga makalikay sa grabing kahuot sa dagan sa trapiko ilabi na og magdali.

Mao ni rason kon nganong kadaghanan sa local government unit lugak daw sa mitugot sab sa habal-habal.

So dili mayor’s permit ang isyu kon dili mao ang paghatag og kahigayonan nga kahatagan og igong kasulbaran ang panginahanglan sa publiko.