Kinsa ang hamtong?

Gisungog sa iyang mga barkada si Ellen (tinuod ngalan gitago) atol sa iyang 50 anyos nga adlaw’ng natawhan kay nagpabilin kining dalaga ug padayong nangandoy nga sa ugma damlag maka-kaplag og lalaking moangkon sa iyang kasing-kasing.

Matod sa iyang mga higala, pilian ug taas og standard si Ellen maong wa gihapo’y uyab bisag daghang buyog ang nag-alirong ug nagpa-uraray.

Tubag ni Ellen, bahala na og di taas ug ambungan basta swak sa iyang personalidad, ligdong ug hamtong og panghuna-huna ug disposisyon sa kinabuhi og tim-os kung mahigugma.

Taas iyang pagsalig nga puhon dunay madagma sa iyang agi-anan nga magpabilin sa iyang dughan. Kung kining hamtong nga ‘forever’ nga mo-abot para og buot kaniya, way angay ikahingawa ug kabalak-an kay kini magpabilin man sa iyang kiliran sa kalipay ug kasakit.

Unsaon man pag-ila sa hamtong kon matured nga mahimong forever ni Ellen?

Aron mas masabtan, diay hulagway sa mga nagkanihit ug gipangitang mga hamtong: Ang hamtong kon matured,

‘open-minded’. Pasabot, dako og dunggan sa pagpaminaw ug maayong mo timbang-timbang sa mga panghitabo ug huna-huna una mo-desisyon sa sunod nga himuong aksyon.

Abre kini siya sa mga sugyot sa uban. Andam modawat sa kapakyasan ug kaantigong mangayo og pasaylo sa mga nasayop ug nakalapas kaniya. Mo-respito sab ni siya sa kala- ug pagkatawo sa uban.

Ang mga hamtong di gusto og langas nga palibot. Dili sab kini ganahan og drama sa kinabuhi sama sa maglaygay nga away o way pagsinabtanay labi na kung way klarong hinungdan.

Ma Biyernes o adlaw nga ting-laag, mas makuntinto kining matulog ug mag-urong kaysa manglakwatsa. Mas pillion ini niya ang paghimo og kaugalingong kalihukan nga mas makapalipay niya. Dili sab kini magsalig sa uban.

Kung makigrelasyon, dili kini mag-usik-usik sa panahon og kuyog-kuyog sa mga way buot kay para niya ang gugma dili man ipamugos.

Tungod sa iyang kasinatian, dali kining makasabot kung anus-a buhian ang gugma nga dili para niya.